ភ្នំពេញ៖ក្រុមចោរចំនួន៤នាក់ជិះម៉ូតូ២គ្រឿង បានឆក់ទូរសព្ទពីអ្នកគ្រូពេទ្យម្នាក់បានសម្រេចនិងកៀរផ្តួលម៉ូតូជនរងគ្រោះផ្ទប់រថយន្តឱ្យរងរបួស ហើយចោរនាំគ្នាជិះម៉ូតូគេចខ្លួនបាត់អស់។ហេតុការណ៍នេះបានកើតឡើងតាមផ្លូវជាតិលេខ៤ ខាងលិចស្ពានអាកាសចោមចៅ ក្នុងភូមិព្រៃព្រីងជើង១ សង្កាត់ចោមចៅទី៣ ខណ្ឌពោធិ៍សែនជ័យ កាលពីព្រឹកថ្ងៃទី១៩ ខែមករា។
សាក្សីបានឱ្យដឹងថា មុនកើតហេតុ ក្រុមចោរ៤នាក់បានជិះម៉ូតូម៉ាកហុងដាឌ្រីមចំនួន២គ្រឿង។ ចំណែកស្ត្រីរងគ្រោះមិនបានប្រាប់អត្តសញ្ញាណទេដោយបានបង្ហើបថាជាគ្រូពេទ្យប្រចាំនៅគ្លីនិកឯកជនមួយក្បែរប៉ុស្តិ៍នគរបាលចោមចៅទី៣ បានរងរបួស ហើយបាត់ទូរសព្ទម៉ាកIPhone 14 Pro Max មួយគ្រឿង។
អ្នកគ្រូពេទ្យពេលកំពុងជិះម៉ូតូម៉ាកស្កុបពី ត្រូវក្រុមគ្រួសារបានទូរសព្ទចូល ហើយគាត់ក៏ដកទូរសព្ទចេញពីហោប៉ៅយកមកនិយាយ ក៏ត្រូវចោរ២នាក់ជិះម៉ូតូមកឆក់យកទូរសព្ទបានសម្រេច។ ភ្លាមៗនោះជនរងគ្រោះបានជិះម៉ូតូដេញតាមនិងស្រែកថាចោរៗ ស្រាប់តែមានចោរ២នាក់ទៀតជិះម៉ូតូមកពីក្រោយកៀរម៉ូតូអ្នកគ្រូពេទ្យរូបនោះដួលផ្ទប់រថយន្តបណ្ដាលឱ្យរងរបួសតែម្តង៕ដោយ៖វិចិត្រ
