ប្រធានាធិបតីអ៊ុយក្រែន ហ្សេឡិនស្គី បានសរសេរសំបុត្រអញ្ជើញប្រធានាធិបតីចិន ស៊ីជីនពីង សម្រាប់ការសន្ទនា ខណៈដែលការឈ្លានពានរបស់រុស្ស៊ីឈានចូលជិតដល់ខួបមួយឆ្នាំ។
![](https://cambodiaflashnews.com/wp-content/uploads/2021/06/top-banner.gif)
យោងតាមសារព័ត៌មានអាល់ចាហ្សេរ៉ា សំបុត្រនេះត្រូវបានប្រគល់ទៅកាន់គណៈប្រតិភូចិននៅទីក្រុង Davos ប្រទេសស្វីស នៅឯវេទិកាសេដ្ឋកិច្ចពិភពលោក តាមរយៈភរិយារបស់គាត់ គឺលោកស្រី Olena Zelenska កាលពីថ្ងៃពុធ ទី១៨ ខែមករា ឆ្នាំ២០២៣។ Zelenska ភរិយាលោកហ្សេឡិនស្គី បានប្រាប់អ្នកយកព័ត៌មានថា “នេះគឺជាកាយវិការ និងការអញ្ជើញដោយសុទ្ធចិត្តសម្រាប់ការសន្ទនាជាមួយភាគីចិន ហើយខ្ញុំសង្ឃឹមយ៉ាងខ្លាំងថានឹងមានការឆ្លើយតបវិជ្ជមានចំពោះការអញ្ជើញនេះ”។
Zelenskyy ក៏ធ្លាប់បានប្រាប់កាសែត South China Morning Post កាលពីខែសីហាផងដែរ ដោយបានស្នើសុំការសន្ទនាជាផ្លូវការជាមួយលោក Xi តែមិនទាន់ទទួលបានទេ។ បន្ទាប់មករដ្ឋមន្ត្រីការបរទេសនៃប្រទេសទាំងពីរបានជួបគ្នានៅខាងក្រៅមហាសន្និបាតអង្គការសហប្រជាជាតិនៅទីក្រុងញូវយ៉កក្នុងខែកញ្ញា។
ទន្ទឹមនឹងសង្រ្គាមជិតដល់ខួបមួយឆ្នាំ អ្នកវិភាគមួយចំនួនបានលើកឡើងថា ទីបំផុតចិនអាចឈានជើងចូលជាអ្នកសម្រុះសម្រួល ដើម្បីកិច្ចចរចាបញ្ចប់ការប្រយុទ្ធនៅអ៊ុយក្រែន បើទោះជាចិននិងរុស្ស៊ីត្រូវបានគេដឹងគ្រប់គ្នាថា បានប្រកាសភាពជាដៃគូ “គ្មានដែនកំណត់” ជាមួយគ្នា។ រដ្ឋមន្ត្រីការបរទេសចិន លោក Wang Yi បានអំពាវនាវកាលពីខែកញ្ញាឆ្នាំមុន លើគ្រប់ភាគីពាក់ព័ន្ធដើម្បីរក្សាវិបត្តិកុំឱ្យរីករាលដាល ដោយគូសបញ្ជាក់ពីការព្រួយបារម្ភអំពីផលប៉ះពាល់សេដ្ឋកិច្ចនៃជម្លោះដែលបានប៉ះពាល់ដល់ប្រទេសទូទាំងពិភពលោក៕
ប្រភព៖ ALJAZEERA
ប្រភពរូប៖ALJAZEERA
ប្រែសម្រួល៖សុខ តុលា