មនុស្សជាច្រើននាក់បានស្លាប់នៅទូទាំងប្រទេសអាហ្វហ្គានីស្ថាននៅរយៈពេល២សប្តាហ៍ចុងក្រោយនេះ បន្ទាប់ពីអាកាសធាតុចុះត្រជាក់ខ្លាំង ខ្វះខាតនូវការផ្គត់ផ្គង់កម្តៅ។
![](https://cambodiaflashnews.com/wp-content/uploads/2021/06/top-banner.gif)
យោងតាមសារព័ត៌មានអាល់ចាហ្សេរ៉ា បានឲ្យដឹងពីរបាយការណ៍គិតត្រឹមថ្ងៃពុធ ទី ១៨មករានេះ មនុស្សជាង២០នាក់បានស្លាប់នៅទូទាំងខេត្តនានានៃប្រទេស បន្ទាប់ពី រលកត្រជាក់បានបន្តកើតមានអស់រយៈពេល២សប្តាហ៍។ សីតុណ្ហភាពត្រជាក់ខ្លាំងត្រូវបានគេរាយការណ៍ចុះរហូតដល់ទៅ -២១អង្សាសេ រួមមានដូចជាខេត្ត Baghlan ភាគខាងជើង និងសូម្បីតែនៅក្នុងរដ្ឋធានីកាប៊ុលក៏មិនខុសគ្នាផងដែរ។ កាលពីថ្ងៃសុក្រកន្លងទៅនេះ សីតុណ្ហភាពហាក់គ្រាន់បើបន្តិចនៅត្រឹម -១១អង្សាសេ ក៏ប៉ុន្តែវានៅតែពិបាកសម្រាប់ប្រជាជននៃខេត្ត Baghlan។
ប្រភពរាយការណ៍បាននិយាយថា អ្នកស្លាប់គឺបណ្តាលមកពីផ្ទះរបស់ពួកគេមិនមានការផ្គត់ផ្គង់កម្តៅ និងអាហារហូបចុកគ្រប់គ្រាន់។ ពួកគេមិនមានលទ្ធភាពក្នុងការទិញនូវធ្យូងកម្តៅ អុស និងសូម្បីតែអាហារទៀងទាត់។ ជាក់ស្តែងអ្នកស្រុកម្នាក់ឈ្មោះ Shahin ដែលមានសមាជិកគ្រួសារដល់ទៅ ១២ នាក់ បានរៀបរាប់ថា “យើងបានទិញធ្យូងខ្លះនៅដើមរដូវរងា ប៉ុន្តែក្នុងអាកាសធាតុត្រជាក់នេះ ការផ្គត់ផ្គង់របស់យើងជិតអស់ហើយ ហើយយើងមិនអាចមានលទ្ធភាពទិញបានទៀតទេ”។
ចាប់តាំងពីរដ្ឋបាលតាលីបង់ឡើងកាន់អំណាចមក សេដ្ឋកិច្ចប្រទេសអាហ្វហ្គានីស្ថានបានជួបប្រទះនឹងទុក្ខលំបាកយ៉ាងខ្លាំង។ ប្រជាជនមានជីវភាពដុនដាប ខ្វះខាតស្បៀងអាហារ វិបត្តិហិរញ្ញវត្ថុ បង្ខំឲ្យមេគ្រួសារខ្លះបានសម្រេចចិត្តលក់សារីរាង្គកាយជាថ្នូរ៕
ប្រភព៖ ALJAZEERA
ប្រភពរូប៖ALJAZEERA
ប្រែសម្រួល៖សុខ តុលា