បាត់ដំបង៖ឪពុកមានិងក្មួយប្រសាបានផឹកស្រាស្រវឹងក៏កើតជម្លោះពាក្យសម្តី ត្រូវជនដៃដល់ជាពូបានយកកាំបិតចុងស្រួចចាក់ក្មួយឱ្យរងរបួសធ្ងន់ ត្រូវនគរបាលចាប់បញ្ជូនទៅតុលាការ។
![](https://cambodiaflashnews.com/wp-content/uploads/2021/06/top-banner.gif)
មន្ត្រីនគរបាលប៉ុស្តិ៍បានឱ្យដឹងថា ករណីហិង្សានេះបានកើតឡើងនៅភូមិអូរច្រាប ឃុំសំឡូត ស្រុកសំឡូត ខេត្តបាត់ដំបង កាលពីយប់ថ្ងៃទី១៦ ខែមករា។បន្ទាប់ពីទទួលដំណឹង កម្លាំងនគរបាលស្រុកសំឡូតជាមួយនគរបាលប៉ុស្តិ៍បានចុះទៅដល់ចាប់បុរសដៃដល់ភ្លាមៗ។
ជនសង្ស័យឈ្មោះ ញ៉ញ ដេន អាយុ៥៤ឆ្នាំ នៅភូមិ ឃុំខាងលើ បានយកកាំបិតចុងស្រួចចាក់ទៅលើក្មួយប្រសាឈ្មោះសោ សន អាយុ២៩ឆ្នាំ នៅភូមិ ឃុំជាមួយគ្នាចំនួន២កាំបិតបណ្ដាលឱ្យរងរបួសធ្ងន់។មន្ត្រីដដែលបានបន្តថា ករណីខាងលើគឺបណ្តាលមកពីពូនិងក្មួយផឹកស្រាស្រវឹងទាស់សម្តីប្រកែកគ្នា រហូតដល់ប្រើកាំបិតចាក់ទៅលើជនរងគ្រោះតែម្តង។
ចំណែកអ្នករងរបួសធ្ងន់ត្រូវបញ្ជូនទៅមន្ទីរពេទ្យខេត្តបាត់ដំបង។រីឯជនសង្ស័យត្រូវនគរបាលស្រុកសំឡូតបានកសាងសំណុំរឿងបញ្ជូនបន្តតាមនីតិវិធី៕ដោយ៖វិចិត្រ