កែប៖ នាអំឡុងពេលចុងក្រោយនេះ ប្រជានេសាទខេត្តកែបតែងប្រគល់ជូនជាបន្តបន្ទាប់ដល់ខណ្ឌរដ្ឋបាលជលផលនៃមន្ទីរកសិកម្ម រុក្ខាប្រមាញ់ និងនេសាទនូវសត្វល្មិចក្រោយពេលពួកគាត់ចាប់បានដើម្បីលែងចូលសមុទ្រវិញ។ នេះបង្ហាញថាប្រជាពលរដ្ឋកាន់តែយល់ដឹង និងបានផ្លាស់ប្តូរឥរិយាបថពីគំនិតអាត្មានិយមមកជាការចូលរួមអភិរក្សសត្វកម្រដើម្បីប្រយោជន៍រួមសម្រាប់អនាគត។
លោកថឹង បូរិន ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកែបបានប្រាប់ឲ្យដឹងថា ថ្មីៗនេះ អ្នកនេសាទបានប្រគល់អណ្តើកសមុទ្រ ឬហៅថាសត្វល្មិចចំនួនបួនក្បាលជូនខណ្ឌរដ្ឋបាលជលផលជាបន្តបន្ទាប់ដើម្បីឲ្យមន្ត្រីជំនាញ និងអាជ្ញាធរលែងចូលសមុទ្រវិញក្រោយពីពួកគាត់ចាប់បាន។ ក្នុងចំណោមសត្វល្មិចទាំងបួនក្បាលនោះ គឺបីក្បាលទើបនឹងកកើតថ្មី ចំណែកមួយទៀតជាល្មិចដែលធ្លាប់បានលែងកាលពីឆ្នាំ២០១៨។
លោកប្រធានមន្ទីរបានបន្តថា កន្លងទៅ មន្ត្រីជំនាញសហការជាមួយគ្រប់ផ្នែកពាក់ព័ន្ធបានចុះណែនាំ អប់រំ និងជួបផ្ទាល់ជាមួយប្រជានេសាទដើម្បីបញ្ជ្រាបអំពីវិធានការគាំពារ អភិរក្សសត្វសមុទ្រប្រភេទកម្រ ដូចជា ផ្សោត ជ្រូកទឹក ល្មិចជាដើម។ ជាលទ្ធផល មួយរយៈចុងក្រោយនេះ ប្រជានេសាទបានកែប្រែឥរិយាបថ ដោយងាកមកចូលរួមអភិរក្សសត្វកម្រដើម្បីប្រយោជន៍រួមសម្រាប់ថ្ងៃអនាគត។ ត្រឹមតែរយៈពេលជិតមួយខែ មន្ត្រីជំនាញបានទទួលអណ្តើកសមុទ្រពីអ្នកនេសាទជាច្រើនក្បាលរួចយកទៅលែងចូលសមុទ្រឲ្យមានសេរីភាពវិញក្រោយពួកគាត់ចាប់បានភ្លាមៗ។
លោកថឹង បូរិន បានបញ្ជាក់ថា ក្នុងសមុទ្រខេត្តកែបសម្បូរដោយរុក្ខជាតិ ជាហេតុធ្វើឲ្យភោគផលនេសាទកើតមានច្រើន។ នាដំណាក់កាលចុងក្រោយនេះ ក្រុមការងារជំនាញបានប្រទះហ្វូងផ្សោតសមុទ្រច្រើនជាង១០០ក្បាលដែលបង្ហាញខ្លួននៅចន្លោះកោះពោធិ៍។ ជាមួយនោះក៏បានរកឃើញពពួកជ្រូកទឹកជាញឹកញយផងដែរ។ លោកប្រធានមន្ទីរបានបញ្ជាក់ទៀតថា អ្វីដែលជាការកត់សម្គាល់គឺចំនួនសត្វអណ្តើកសមុទ្រមានការកើនឡើងគួរឲ្យមោទន:។ ទាំងនេះតម្រូវឲ្យគ្រប់ផ្នែកពាក់ព័ន្ធបន្តសហការ និងខិតខំបន្ថែមក្នុងការថែរក្សាជម្រករបស់ពពួកសត្វកម្រក្នុងដែនសមុទ្រខេត្តកែបទាំងមូល៕
ដោយ៖កំចាយ
