ភ្នំពេញ៖ អង្ករកម្ពុជា ដែលជាប់ចំណាត់ថ្នាក់អង្ករល្អបំផុតលំដាប់ពិភពលោកចំនួន៥ដង បានត្រូវរំពឹងថានឹងអាចនាំចេញទៅប្រទេសមា់ល់ឌីវនាពេលខាងមុខ។
នៅក្នុងសន្និសីទសារព័ត៌មានរួមគ្នាជាមួយប្រធានាធិបតីនៃប្រទេសម៉ាល់ឌីវ ក្នុងដំណើរទស្សនិច្ចផ្លូវការនៅប្រទេសម៉ាល់ឌីវ នៅថ្ងៃទី១៦ ខែមករា ឆ្នាំ២០២៣ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជាបានបង្ហាញបំណងក្នុងការជំរុញការធ្វើពាណិជ្ជកម្មរវាងកម្ពុជា-ម៉ាល់ឌីវ តាមរយៈការនាំចេញនាំចូលនូវទំនិញសក្តានុពលខ្ពស់មួយចំនួន។
សម្តេចតេជោនាយករដ្ឋមន្ត្រី បានបង្ហាញនូវក្តីសង្ឃឹមថា ដោយសារតែអង្កររបស់កម្ពុជាល្បីល្បាញ ជាប់លេខ១ រយៈពេលពេល៥ដងនោះ គឺមានលទ្ធភាពខ្ពស់ ក្នុងការនាំចេញទៅកាន់ប្រទេសម៉ាល់ឌីវ សម្រាប់បម្រើឲ្យប្រជាជនម៉ាល់ឌីវផង និងសម្រាប់ភ្ញៀវទេសចរមកកម្សាន្តនៅម៉ាល់ឌីវផងដែរ។
សម្តេចតេជោបន្ថែមទៀតថា ក្រៅពីអង្ករកម្ពុជា នៅមានកសិផលផ្សេងទៀត ដូចជាស្វាយចន្ទី ចេក ស្វាយ និងសម្លៀកបំពាក់ ដែលអាចឲ្យកម្ពុជានាំចូលមកម៉ាល់ឌីវ បាន។ជាមួយគ្នានេះ សម្រាប់ផលិតផលដែលម៉ាល់ឌីវ មានលទ្ធផលខ្ពស់ក្នុងការនាំចេញទៅកាន់កម្ពុជា ត្រូវបានសម្តេចតេជោ ហ៊ុន សែន បានលើកឡើង គឺជាត្រីខកំប៉ុងដែលផលិតនៅម៉ាល់ឌីវ និងផលិតផលត្រីមួយចំនួនទៀតផងដែរ។
សូមជម្រាបថា អង្កររបស់កម្ពុជាទទួលបានជ័យលាភីជា «អង្ករល្អដាច់គេ» របស់ពិភពលោកចំនួន៥ដង គឺនៅឆ្នាំ២០១២ ឆ្នាំ២០១៣ ឆ្នាំ២០១៤ ឆ្នាំ២០១៨ និងចុងក្រោយនៅឆ្នាំ២០២២៕ដោយៈសិរីមតី
