ភ្នំពេញ៖តុលាការភ្នំពេញ កាលពីរសៀលថ្ងៃទី១៦ ខែមករា បានឃុំខ្លួនអនុប្រធានគណបក្សភ្លើងទៀនមួយរូបពាក់ព័ន្ធករណីចេញសែកទៅម្ចាស់បំណុលគ្មានសាច់ប្រាក់ចំនួន៥សន្លឹក។
![](https://cambodiaflashnews.com/wp-content/uploads/2021/06/top-banner.gif)
សមត្ថកិច្ចបានឱ្យដឹងថា ការឃុំខ្លួនជនជាប់ចោទឈ្មោះថាច់ សេដ្ឋា មានតួនាទីជាអនុប្រធានគណបក្សភ្លើងទៀន ក្រោមបទចោទប្រកាន់ចេញសែកទៅម្ចាស់បំណុលគ្មានសាច់ប្រាក់ចំនួន៥សន្លឹក និងបញ្ជូនទៅឃុំខ្លួនដាក់ពន្ធនាគារបណ្តោះអាសន្ន។
មន្ត្រីដដែលបានបន្តថា កម្លាំងនគរបាលរាជធានីភ្នំពេញបានឃាត់ខ្លួនជនជាប់ចោទតាមដីកាបង្គាប់ឱ្យនាំខ្លួនរបស់ចៅក្រមស៊ើបសួរ ចុះថ្ងៃទី១៦ ខែមករា ឆ្នាំ២០២៣។ មន្ត្រីតុលាការភ្នំពេញបានឱ្យដឹងថា កាលពីថ្ងៃទី២៦ ខែវិច្ឆិកា ឆ្នាំ២០១៩ តុលាការបានទទួលបណ្តឹងពីក្រុមហ៊ុន“រិនឆាយរនាប” បានប្តឹងឈ្មោះថាច់ សេដ្ឋា ពីបទចេញសែក៥សន្លឹកគ្មានសាច់ប្រាក់។
ក្នុងដំណាក់កាលស៊ើបសួរ ជនជាប់ចោទឈ្មោះថាច់ សេដ្ឋា មិនបានចូលឆ្លើយបំភ្លឺតាមដីកាបង្គាប់ឱ្យចូលខ្លួនចំនួន២លើក ទើបចៅក្រមស៊ើបសួរចេញដីកាឱ្យនាំខ្លួនមកស្តាប់ចម្លើយតាមនីតិវិធី។ក្រោយពេលសាកសួរ ចៅក្រមបានចេញដីកាឃុំខ្លួនឈ្មោះថាច់ សេដ្ឋា បណ្តោះអាសន្ន។តែតុលាការមិនបានបញ្ជាក់ពីចំនួនសាច់ប្រាក់ដែលសែកស្អុយទាំងនោះមានប៉ុន្មាននៅឡើយទេខណ:កំពុងបន្តនីតិវិធី៕ដោយ៖វិចិត្រ