ប្រធានាធិបតីរុស្ស៊ីលោកវ្ល៉ា ឌឹមៀរពូទីន បាននិយាយថា ប្រតិបត្តិការយោធានៅអ៊ុយក្រែនបច្ចុប្បន្ននេះកំពុងទទួលបានសន្ទុះវិជ្ជមានគួរជាទីពេញចិត្ត ដោយបន្តជំរុញកងកម្លាំងឲ្យខិតខំដើម្បីជ័យជម្នះបន្ថែមទៀត។
លោកពូទីនបានប្រាប់ទូរទស្សន៍រដ្ឋ Rossiya 1 យ៉ាងដូច្នេះកាលពីថ្ងៃអាទិត្យ ពិសេសនៅពេលសួរអំពីការចាប់យកតំបន់រ៉ែអំបិលអ៊ុយក្រែន Soledar។ ពូទីននិយាយថា “ថាមពលគឺវិជ្ជមាន” ។ “អ្វីៗកំពុងអភិវឌ្ឍន៍ទៅមុខក្នុងក្របខ័ណ្ឌនៃផែនការរបស់ក្រសួងការពារជាតិ និងអគ្គសេនាធិការ”។ “ខ្ញុំសង្ឃឹមថា អ្នកប្រយុទ្ធរបស់យើងនឹងពេញចិត្តកាន់តែច្រើនជាមួយនឹងលទ្ធផលនៃការប្រយុទ្ធរបស់ពួកគេ និងប្រឹងបន្ថែមទៀត”។
ដំណឹងផ្លូវការនេះ ចេញបន្ទាប់ពីក្រសួងការពារជាតិរុស្ស៊ីបាននិយាយកាលពីថ្ងៃសុក្រថា កងកម្លាំងរបស់ខ្លួនបានកាន់កាប់ Soledarទាំងស្រុងហើយ ដែលជាជោគជ័យដ៏កម្រមួយសម្រាប់ទីក្រុងមូស្គូ បន្ទាប់ពីសមរភូមិបានដើរបញ្ច្រាសទិសអស់រយៈពេលជាច្រើនខែ។ វិទ្យាស្ថានសិក្សាអំពីសង្រ្គាមមានមូលដ្ឋាននៅអាម៉េរិក កាលពីចុងសប្តាហ៍ហាក់ដូចជាបានទទួលស្គាល់ថា អ៊ុយក្រែនពិតជាបាត់បង់ទីនោះពិតប្រាកដមែន៕
ប្រភព៖ REUTERS
ប្រភពរូប៖REUTERS
ប្រែសម្រួល៖សុខ តុលា