ភ្នំពេញ៖«វេទិកាសាធារណៈលើកទី១ស្ដីពីការដោះស្រាយលក់អចលវត្ថុជាប់គាំងនិងបច្ចេកវិទ្យាអចលនវត្ថុក្នុងសម័យកាលបច្ចុប្បន្នបានផ្តល់នូវចំណេះដឹងបទពិសោធន៍ល្អៗជាក់ស្តែងពីវាគ្មិនជាតិនិងអន្តរជាតិដែលអាចយកទៅអនុវត្តផ្ទាល់ក្នុងអាជីវកម្មនិងក្នុងវិស័យអចលនទ្រព្យ»។នេះជាការលើកឡើងរបស់លោក កង សុវណ្ណថា ប្រធានសមាគមអ្នកជំនាញអចលនទ្រព្យកម្ពុជា។
នៅក្នុងវេទិកាសាធារណៈ ស្ដីពីការដោះស្រាយលក់អចលវត្ថុជាប់គាំងនិងបច្ចេកវិទ្យាអចលនវត្ថុក្នុងសម័យកាលបច្ចុប្បន្នដែលរៀបចំសមាគមអ្នកជំនាញអចលនទ្រព្យកម្ពុជា នារសៀលថ្ងៃទី១៤ ខែមករា ឆ្នាំ២០២៣ នៅវិទ្យាស្ថានបច្ចេកវិទ្យាកម្ពុជា តិចណូ (ITC) លោក កង សុវណ្ណថា បានមានប្រសាសន៍ថា៖សមាគមអ្នកជំនាញអចលនទ្រព្យកម្ពុជាព្យាយាមបង្កើតវេទិកាដ៏មានសារៈប្រយោជន៍និងសារសំខាន់ដល់ សមាជិកសមាជិកា ធុរកិច្ចជន ម្ចាស់ក្រុមហ៊ុន និងម្ចាស់អាជីវកម្មដើម្បីបានទទួលនូវបទពិសោធន៍ចំណេះដឹងបទពិសោធន៍ល្អៗពីវាគ្មិនជាតិនិងអន្តរជាតិ។
លោកបានបញ្ជាក់ថា៖នេះជាលើកទីមួយដែលសមាគមបានធ្វើវេទិកាសាធារណៈហើយសមាគមនឹងបន្តធ្វើបន្តទៀតនៅរាជធានីភ្នំពេញហើយនៅពេលខាងមុខអាចនឹងពង្រីកទៅដល់តាមបណ្ដាខេត្តទៀត។
សូមជម្រាបថា៖កម្មវិធីវេទិកានេះ គឺបានរៀបចំជា២វគ្គ ដែលវគ្គទី១ រៀបចំដោយផ្តោតដល់បទបង្ហាញគន្លឹះលើប្រធានសំខាន់ៗមួយចំនួនរួមមាន៖
១- បទបង្ហាញអំពីនីតិវិធីរៀបចំបញ្ជីស្នាមពន្ធដារក្រុមហ៊ុនក្នុងអាជីវកម្មអចលនវត្ថុ ដែលបទបង្ហាញដោយឯកឧត្តម អ៊ុំ សារ៉ាវុធ ទីប្រឹក្សាគណៈកម្មាធិការបច្ចេកទេសនៃសមាគម និងប្រធានក្រុមហ៊ុន USRV International Business Consultant Co.,Ltd.
២- បទបង្ហាញអំពីយុទ្ធសាស្ត្រធ្វើទីផ្សារអចលនវត្ថុតាមស្តង់ដារអន្តរជាតិ ដែលបទបង្ហាញMs. Lea Bogatin
នាយិកាគ្រប់គ្រងក្រុមហ៊ុន Linx International។
៣- បទបង្ហាញអំពីតិចនិចលក់អចលនវត្ថុ ឱ្យចេញលឿនក្នុងស្ថានភាពបច្ចុប្បន្ន ដែលបទបង្ហាញលោក តូវ ម៉េងអ្នកជំនាញបណ្ដុះបណ្ដាលផ្នែកលក់
៤- បទបង្ហាញអំពីការរៀបចំប្រព័ន្ធទិន្នន័យអចលនវត្ថុ តាមប្រព័ន្ធបច្ចេកវិទ្យា ដែលបទបង្ហាញលោក ចេង វុទ្ធី ទីប្រឹក្សាគណៈកម្មាធិការបច្ចេកទេសនៃសមាគម និងជាអគ្គនាយកក្រុមហ៊ុន អ៊ីនវ៉ា និងវគ្គ ទី២ គឺផ្តោតលើកិច្ចពិភាក្សាស្តីពីការដោះស្រាយលក់អចលវត្ថុជាប់គាំង និងបច្ចេកវិទ្យាអចលនវត្ថុក្នុងសម័យកាលបច្ចុប្បន្ន និងវេទិកាសំណួរ-ចម្លើយ ជូនដល់សមាជិក-សមាជិកានិងអង្គសិក្ខាកាមដែលបានចូលរួមដោយបើកចំហ និងទទួលបានធាតុចូលសំខាន់ៗ។
នៅក្នុងវេទិកានេះ ឯកឧត្តម អ៊ុំ សារ៉ាវុធ បានចែករំលែកចំណេះដឹង បទពិសោធន៍និងពន្យល់អំពីវិស័យពន្ធដារក្នុងវិស័យអចលនទ្រព្យនិងកាតព្វកិច្ចពន្ធដារថាតើអ្នករកស៊ីត្រូវធ្វើអ្វីខ្លះ មានកាតព្វកិច្ចអ្វីខ្លះ។
ឯកឧត្តមអគ្គនាយកក្រុមហ៊ុនUSRV Group បានលើកឡើងថា៖អ្នកធ្វើអាជីវកម្មវិស័យអចលនទ្រព្យនិងការរកស៊ីផ្សេងៗគឺចៀសមិនផុតពីការបង់ពន្ធ វិស័យណាក៏ដោយឲ្យតែរកស៊ីគឺត្រូវមានកាតព្វកិច្ចបង់ពន្ធជូនរដ្ឋ។វេទិកាសាធារណៈនេះពិសេសណាស់ដែលសមាគមរៀបចកម្មវិធីនេះឡើងដើម្បីឲ្យធុរកិច្ចជនម្ចាស់អាជីវកម្មបានស្វែងយល់អំពីបញ្ហានីតិវិធីច្បាប់ របៀបរបបធ្វើអាជីវកម្មដើម្បីយកចំណេះដឹងទៅអនុវត្តលើការងារអាជីវកម្មរបស់ខ្លួន។
លោក ចេង ពុទ្ធី ទីប្រឹក្សាគណៈកម្មាធិការបច្ចេកទេសនៃសមាគម អ្នកជំនាញអចលនទ្រព្យកម្ពុជា និងជាអគ្គនាយកក្រុមហ៊ុន អ៊ីនវ៉ា បានថ្លែងថា៖បច្ចេកវិទ្យាមានសារៈសំខាន់ណាស់នៅក្នុងវិស័យអចលនទ្រព្យដោយអាចជួយឱ្យមានសុក្រឹត្យភាពក្នុងការរៀបចំការគ្រប់គ្រងការងារអចលនទ្រព្យ ។បច្ចេកវិទ្យាជួយពន្លឿនការងារ ជួយផ្ដល់លទ្ធភាពនិងធ្វើការងារបានត្រឹមត្រូវ។
លោកបានបន្តថា៖វេទិកានេះល្អ ថ្វីត្បិតតែមានរយៈពេលខ្លី តែមានអត្ថប្រយោជន៍ខ្លាំងពាក់ព័ន្ធទៅនឹងជំនាញទិញលក់ វិស័យពន្ធដារ ការវាយតម្លៃអចលនទ្រព្យ និងបច្ចេកវិទ្យា៕ដោយៈសិរីមតី
