ប្រទេសជប៉ុននិយាយថា ខ្លួនកំពុងបង្កើតមូលដ្ឋានយោធានៅជិតកោះតៃវ៉ាន់ថ្មី ដើម្បីត្រៀមខ្លួនប្រយុទ្ធ និងចូលរួមអន្តរប្រតិបត្តិការរវាងកងកម្លាំងឆ្លើយតបក្នុងករណីមានសង្រ្គាមបង្កឡើងដោយប្រទេសចិន។
យោងតាមកាសែត Washington Post បានឲ្យដឹងពីសេចក្តីរាយការណ៍នេះចេញនៅថ្ងៃសុក្រ ទី១៣ មករា ឆ្នាំ២០២៣។ ក្នុងនោះបាននិយាយថា ជប៉ុនបាននិងកំពុងពង្រីកទ្រព្យសម្បត្តិយោធានៅលើខ្សែសង្វាក់កោះ Yaeyama ខណៈមូលដ្ឋានទ័ពថ្មីកំពុងត្រូវបានគេសាងសង់នៅរវាងកោះ Yonaguni និង Ishigaki ដែលស្ថិតមិនឆ្ងាយប៉ុន្មានពីឆ្នេរខាងកើតរបស់តៃវ៉ាន់។ មេដឹកនាំរបស់ប្រទេសជប៉ុនបានបញ្ជាក់យ៉ាងច្បាស់ថា ការរក្សាស្ថានភាពដដែលនៅក្នុងច្រកសមុទ្រតៃវ៉ាន់ និងការត្រៀមខ្លួនដើម្បីជួយក្នុងវិស័យការពារជាតិតៃវ៉ាន់ គឺជាទិដ្ឋភាពសំខាន់មួយនៃគោលនយោបាយការពារជាតិរបស់ជប៉ុន។
កាលពីខែវិច្ឆិកា ឆ្នាំ ២០២២កន្លងទៅនេះ ប្រទេសជប៉ុនបានប្រកាសពីកញ្ចប់ថវិកាការពារជាតិដ៏ច្រើនសម្បើមមិនធ្លាប់មាន និងបានរៀបចំរចនាសម្ព័ន្ធកងកម្លាំងស្វ័យការពាររបស់ខ្លួន ដើម្បីត្រៀមខ្លួនឱ្យកាន់តែប្រសើរឡើងសម្រាប់ឧបទ្ទវហេតុយោធាណាមួយនៅក្នុងតំបន់បង្កឡើងដោយប្រទេសចិន។ ក្រៅតែពីនេះ នៅដើមឆ្នាំ ២០២៣ ទីក្រុងតូក្យូបានខំខ្នះខ្នែងផ្សារភ្ជាប់សម្ព័ន្ធភាពយោធាគួរឲ្យកត់សម្គាល់ជាមួយសហរដ្ឋអាម៉េរិក ចក្រភពអង់គ្លេស បារាំង និងកាណាដា យល់ព្រមឲ្យមានកិច្ចព្រមព្រៀងការពារជាតិប្រទេសនិងប្រទេស បើកចំហរាល់ការធ្វើចរាចរយោធាតាមផ្លូវគោក ដែនទឹក និងអាកាស។ ដូចបានជម្រាបរួចហើយ ចិនមិនសប្បាយចិត្តទេចំពោះដំណឹងទាំងនេះ អ្នកការទូតលោក Wangwenbin បាននិយាយថា ដែនទឹកឥណ្ឌូប៉ាស៊ីហ្វិកមិនមែនជាកន្លែងលេងហ្គេមនយោបាយទេ ចិនក៏មិនមែនជាភាគីបង្កហេតុដែរ៕
ប្រភព៖ Taiwannews
ប្រភពរូប៖Taiwannews
ប្រែសម្រួល៖សុខ តុលា
