ភ្នំពេញ៖រថយន្តម៉ាកស្តារិចមានបិទឡូហ្គោ បុរីឡេងណាវ៉ាត្រា បានបើកបុកក្បាលថ្មចែកផ្លូវពេញទំហឹង បណ្តាលឱ្យថ្មបាក់បែកជាច្រើនកង់និងរថយន្តខូចខ្ទេចមួយកំណាត់មុខ។ហេតុការណ៍នេះ បានកើតឡើងនៅតាមផ្លូវព្រះមុន្នីវង្ស កែងផ្លូវ១៨២ ក្នុងសង្កាត់បឹងរាំង ខណ្ឌដូនពេញ កាលពីរំលងអធ្រាត្រឈានចូលថ្ងៃទី១៤ ខែមករា។
សាក្សីបានឱ្យដឹងថា មុនកើតហេតុរថយន្តម៉ាកស្តារិច ផ្លាកលេខកំពត2B-5859 បិទឡូហ្គោ បុរីឡេងណាវ៉ាត្រា បានធ្វើដំណើរតាមផ្លូវព្រះមុន្នីវង្សពីត្បូងទៅជើងក្នុងល្បឿនលឿន។
មកដល់កន្លែងខាងលើក៏បុកក្បាលថ្មចែកផ្លូវពេញទំហឹង បណ្ដាលឱ្យថ្មបាក់បែកជាច្រើនកង់ និងរថយន្តខូចខ្ទេចផ្នែកខាងមុខ តែមិនបង្កគ្រោះថ្នាក់ដល់ជីវិតមនុស្សទេ។ក្រោយមកផ្នែកជំនាញបានចុះមកពិនិត្យរួចស្ទូចយករថយន្តបង្កទៅរក្សាទុកនៅការិយាល័យនគរបាលចរាចរណ៍រាជធានីភ្នំពេញដើម្បីឱ្យម្ចាស់ចូលខ្លួនដោះស្រាយ៕ដោយ៖វិចិត្រ
= 