ដើមឆ្នាំ២០២៣ ប្រធានអង្គការណាតូ លោក Jens Stoltenberg មិនចាំយូរ បានប្រកាសជំរុញឲ្យសម្ព័ន្ធមិត្តលោកខាងលិចត្រៀមខ្លួនជួយអ៊ុយក្រែនរយៈពេលវែងទប់ទល់នឹងរុស្ស៊ីទៅមុខទៀត។
ថ្លែងប្រាប់ទៅកាន់ទូរទស្សន៍ BBC នៅថ្ងៃទី១ ខែមករា ឆ្នាំ២០២៣ អគ្គលេខាធិការអង្គការណាតូ លោក Jens Stoltenberg មានប្រសាសន៍ថា សម្ព័ន្ធមិត្តលោកខាងលិចត្រូវតែត្រៀមខ្លួនជាស្រេចក្នុងការផ្តល់ការគាំទ្ររយៈពេលវែងដល់អ៊ុយក្រែន។ ការគាំទ្រផ្នែកយោធានឹងធានាបាននូវការរស់រានមានជីវិតរបស់អ៊ុយក្រែនជាប្រទេសអធិបតេយ្យ។ Stoltenberg បានបន្តថា “កងកម្លាំងអ៊ុយក្រែនមានសន្ទុះទប់ទល់រុស្ស៊ីអស់រយៈពេលជាច្រើនខែមកហើយ ប៉ុន្តែយើងក៏ដឹងដែរថារុស្ស៊ីបានប្រមូលផ្តុំកងកម្លាំងជាច្រើនបន្ថែមទៀត ដែលភាគច្រើននៃពួកគេឥឡូវនេះកំពុងហ្វឹកហាត់” ។
ទន្ទឹមនឹងដំណឹងនេះ មេដឹកនាំណាតូបានកត់សម្គាល់ថា “នោះគឺជាសញ្ញាដែលសង្រ្គាមនឹងបន្តអូសបន្លាយ រុស្ស៊ីនឹងបើកការវាយលុកថ្មីផងដែរ”។ ចាប់តាំងពីសង្រ្គាមថ្ងៃដំបូងមក សម្ព័ន្ធមិត្តណាតូបានផ្តល់សម្ភារយោធារាប់ពាន់លានអឺរ៉ូដល់អ៊ុយក្រែន ខណៈប្រទេសជាសមាជិកនីមួយៗបានកំពុងបញ្ជូនសព្វាវុធ គ្រាប់រំសេវ និងឧបករណ៍យោធាធុនស្រាលនិងធុនធ្ងន់ជាច្រើនប្រភេទ រួមទាំងប្រព័ន្ធប្រឆាំងរថក្រោះ និងប្រព័ន្ធការពារអាកាស យន្តហោះចម្បាំង និងយន្តហោះគ្មានមនុស្សបើក៕
ប្រភព៖ ALJAZEERA
ប្រភពរូប៖ALJAZEERA
ប្រែសម្រួល៖សុខ តុលា
