រដ្ឋាភិបាលប្រទេសស៊ីរីបាននិយាយថា នៅវេលាទៀបភ្លឺចូលថ្ងៃចន្ទនេះ អ៊ីស្រាអែលបានបើកការវាយប្រហារសម្លាប់ទាហានស៊ីរីយ៉ាងហោចណាស់២នាក់ និងធ្វើឲ្យអាកាសយានដ្ឋានទីក្រុង Damascusលែងដំណើរការ។
យោងតាមសេចក្តីថ្លែងការណ៍មួយចេញដោយយោធាស៊ីរី ដែលដកស្រង់ដោយទីភ្នាក់ងារសារព័ត៌មានរដ្ឋផ្លូវការ SANA បានឲ្យដឹងថា ការវាយឆ្មក់តាមអាកាស ដែលសំដៅទៅលើអាកាសយានដ្ឋានអន្តរជាតិ Damascus និងតំបន់ជុំវិញនោះ បានកើតឡើងនៅម៉ោងប្រហែល ២ ទៀបភ្លឺ ម៉ោងក្នុងស្រុក នៅថ្ងៃចន្ទ ទី ២ ខែមករា ឆ្នាំ២០២៣។ សេចក្តីថ្លែងការណ៍បាននិយាយថា ការវាយប្រហារនេះគឺធ្វើឡើងដោយកងកម្លាំងអ៊ីស្រាអែល បណ្តាលឱ្យស្លាប់ទាហានពីរនាក់ របួសពីរនាក់ បាត់បង់ ខូចខាតសម្ភារមួយចំនួន និងបានធ្វើឱ្យអាកាសយានដ្ឋានលែងដំណើរការទៀតផង។
ជុំវិញការចោទប្រកាន់និងអះអាងនេះ មិនមានការអត្ថាធិប្បាយភ្លាមៗពីខាងអ៊ីស្រាអែលនោះទេ។ ឧបទ្ទវហេតុនេះគឺជាលើកទីពីរហើយដែលកើតឡើងលើអាកាសយានដ្ឋានអន្តរជាតិ Damascus ខណៈទើបតែដាក់ឲ្យដំណើរការមិនដល់១ឆ្នាំផងនោះ។ ការវាយប្រហារនៅថ្ងៃចន្ទនេះ កើតឡើងប៉ុន្មានថ្ងៃបន្ទាប់ពីប្រមុខយោធាអ៊ីស្រាអែល ឧត្តមសេនីយ៍ទោ Oded Basiuk បានបង្ហាញទស្សនវិស័យប្រតិបត្តិការរបស់កងទ័ពសម្រាប់ឆ្នាំ ២០២៣។ អ៊ីស្រាអែលបានធ្វើការវាយឆ្មក់រាប់រយលើកលើគោលដៅនានា នៅក្នុងផ្នែកដែលគ្រប់គ្រងដោយរដ្ឋាភិបាលនៃប្រទេសស៊ីរីក្នុងរយៈពេលប៉ុន្មានឆ្នាំថ្មីៗនេះ ប៉ុន្តែកម្រនឹងទទួលស្គាល់ ឬពិភាក្សាអំពីប្រតិបត្តិការបែបនេះណាស់។ ទោះបីជាយ៉ាងណាក៏ដោយ អ៊ីស្រាអែលបានទទួលស្គាល់ថា ខ្លួនបានកំណត់គោលដៅលើមូលដ្ឋានរបស់ក្រុមប្រដាប់អាវុធសម្ព័ន្ធមិត្តអ៊ីរ៉ង់ ដូចជាក្រុមហេសបូឡា របស់ប្រទេសលីបង់ ដែលបានបញ្ជូនអ្នកប្រយុទ្ធរាប់ពាន់នាក់ទៅគាំទ្រកងកម្លាំងរបស់ប្រធានាធិបតីស៊ីរី បាសា អាសាដ៕
ប្រភព៖ ALJAZEERA
ប្រភពរូប៖ALJAZEERA
ប្រែសម្រួល៖សុខ តុលា
