កែប៖ រាជរដ្ឋាភិបាលកម្ពុជា បានសម្រេចបញ្ចប់មុខតំណែងលោកភូ លិ អភិបាលរងខេត្តកែបខណៈសមត្ថកិច្ចកំពុងដំណើរការតាមបណ្តឹងរបស់ជនរងគ្រោះពីបទព្រហ្មទណ្ឌ បន្ទាប់ពីអភិបាលរងខេត្តរូបនេះបានប្រព្រឹត្តអំពើបៀតបៀនលើស្ត្រីម្នាក់និងបង្ករបួសស្នាមធ្ងន់ធ្ងរដល់ស្ត្រីម្នាក់ទៀតកាលពីយប់ថ្ងៃទី២៩ ខែធ្នូកន្លងទៅ។
![](https://cambodiaflashnews.com/wp-content/uploads/2021/06/top-banner.gif)
យោងអនុក្រឹត្យលេខ១២០២ អនក្រ.តត ចុះថ្ងៃទី៣១ ខែធ្នូ ឆ្នាំ២០២២ មានខ្លឹមសារថា៖ ត្រូវបានបញ្ចប់មុខតំណែងលោកភូ លិ ឋានន្តរស័ក្តិវរមន្ត្រីថ្នាក់លេខ១ ពីអភិបាលរងនៃគណៈអភិបាលខេត្តកែប។
សូមរំលឹកថា កាលពីយប់ថ្ងៃទី២៩ ខែធ្នូ ឆ្នាំ២០២២ លោកភូ លិ បានអញ្ជើញចូលរួមក្នុងពិធីជប់លៀងអបអរសាទរពិធីចូលកាន់មុខតំណែងប្រធានមន្ទីរបរិស្ថានខេត្តកែប។នៅពេលមានភាពស្រវឹង លោកអភិបាលរងខេត្តរូបនេះបានដើរទៅកាន់តុមួយរួចថើបក្បាលស្ត្រីឈ្មោះទ.ម.រ។
បន្ទាប់ពីស្ត្រីសាមីខ្លួនហាមមិនឱ្យធ្វើទង្វើមិនសមរម្យបែបនោះព្រោះនាងមានប្តី រីឯលោក ភូ លិ ក៏ត្រឡប់ទៅតុវិញ។មួយសន្ទុះក្រោយមក លោកភូ លិ ក៏ដើរទៅម្តងទៀត ទើបស្រ្តីម្នាក់ត្រូវជាបងប្អូនរបស់ស្ត្រី ទ.ម.រ បាននាំនាងចេញបំណងត្រឡប់ទៅផ្ទះវិញខ្លាចក្រែងមានបញ្ហាកើតឡើង។
ឃើញដូច្នោះ លោក ភូ លិ ក៏យកកែវស្រាគប់សំដៅលើស្ត្រី ទ.ម.រ តែចៃដន្យកែវនោះបានត្រូវចំបងប្អូនអ្នកនាំនាងចេញបណ្តាលឱ្យរយះត្របកភ្នែកហូរឈាមស្រោចខ្លួនរងរបួសធ្ងន់ធ្ងរ។ស្ត្រីរងគ្រោះត្រូវពេទ្យដេរមុខរបួសចំនួន១៦ថ្នេរ។ជាមួយហេតុការណ៍នេះស្ត្រីទាំង២នាក់បានដាក់បណ្តឹងចូលសមត្ថកិច្ចដើម្បីចាត់ការតាមច្បាប់៕ដោយ៖កំចាយ