ប្រធានាធិបតីរុស្ស៊ី លោកវ្ល៉ាឌឹមៀរពូទីន រំពឹងចង់ឲ្យលោកប្រធានាធិបតីចិនស៊ីជីនពីងធ្វើដំណើរទស្សនកិច្ចមកកាន់ទីក្រុងមូស្គូនៅឆ្នាំ២០២៣ខាងមុខនេះ ដើម្បីបង្ហាញពីសាមគ្គីភាពនៃរដ្ឋទៅកាន់ពិភពលោក។
លោកពូទីនបាននិយាយកាលពីថ្ងៃសុក្រក្នុងអំឡុងជួបជជែកតាមវីដេអូជាមួយលោកស៊ីជីនពីងថា “យើងកំពុងរង់ចាំអ្នក ប្រធានជាទីគោរព មិត្តជាទីស្រឡាញ់ យើងរំពឹងថាអ្នក នឹងមានវត្តមាននៅនិទាឃរដូវក្រោយក្នុងដំណើរទស្សនកិច្ចផ្លូវរដ្ឋមកកាន់ទីក្រុងម៉ូស្គូ” ។ លោកបាននិយាយថា ដំណើរទស្សនកិច្ចនេះនឹង “បង្ហាញដល់ពិភពលោកនូវភាពជិតស្និទ្ធដែកថែបនៃទំនាក់ទំនងរុស្ស៊ីនិងចិន”។ លោកពូទីន បាននិយាយថា ទំនាក់ទំនងរុស្ស៊ី-ចិន កំពុងតែរីកលូតលាស់នៅក្នុងសារសំខាន់ ដែលជាកត្តាស្ថិរភាព ហើយថាលោកមានបំណងធ្វើឱ្យស៊ីជម្រៅកិច្ចសហប្រតិបត្តិការយោធារវាងប្រទេសទាំងពីរ។
ឆ្លើយតបជាមួយគ្នា លោក Xi បានបន្ថែមថា ប្រទេសចិនបានត្រៀមខ្លួនរួចជាស្រេចក្នុងការបង្កើនកិច្ចសហប្រតិបត្តិការជាយុទ្ធសាស្ត្រជាមួយរុស្ស៊ីប្រឆាំងនឹងអ្វីដែលលោកហៅថាស្ថានភាពលំបាកនៅក្នុងពិភពលោកទាំងមូល។ តែយ៉ាងណា លោកមិនបានសង្កត់ធ្ងន់ពីបញ្ហាភូមិសាស្រ្តនយោបាយក្នុងវិបត្តិសង្រ្គាមនៅអ៊ុយក្រែននោះទេ៕
ប្រភព៖ ALJAZEERA
ប្រភពរូប៖ALJAZEERA
ប្រែសម្រួល៖សុខ តុលា
