សហរដ្ឋអាម៉េរិក បានអនុម័តការលក់ប្រព័ន្ធប្រឆាំងរថក្រោះ និងដាក់ពង្រាយមីន Volcano តម្លៃ១៨០លានដុល្លារទៅតៃវ៉ាន់ ចំពេលដែលតៃវ៉ាន់មានភាពតានតឹងខ្លាំងជាមួយចិន។
![](https://cambodiaflashnews.com/wp-content/uploads/2021/06/top-banner.gif)
មន្ទីរបញ្ចកោណបាននិយាយកាលពីថ្ងៃពុធសប្តាហ៍នេះថា ក្រសួងការបរទេសសហរដ្ឋអាម៉េរិក បានអនុម័តការលក់ប្រព័ន្ធដាក់ពង្រាយមីនប្រឆាំងរថក្រោះម៉ាក Volcano ទៅឱ្យកោះតៃវ៉ាន់ក្នុងតម្លៃ ប៉ាន់ស្មានប្រហែល១៨០លានដុល្លារ។ ប្រព័ន្ធ Volcanoនេះ ត្រូវបានបង្កើតឡើងដោយកងទ័ពសហរដ្ឋ អាម៉េរិកក្នុងទសវត្សរ៍ឆ្នាំ ១៩៨០ ប្រើសម្រាប់ដាក់ពង្រាយគ្រាប់មីន ដាក់បង្កៃគ្រាប់បែករាយប៉ាយ ទុកប្រឆាំងនឹងរថក្រោះ។
កិច្ចព្រមព្រៀងដ៏មានសក្តានុពលនេះ កើតឡើងនៅពេលដែលប្រទេសចិនបានបង្កើនសម្ពាធផ្នែកយោធា ការទូត និងសេដ្ឋកិច្ចលើកោះតៃវ៉ាន់ រួមទាំងបេសកកម្មរបស់កងទ័ពអាកាសចិនស្ទើរតែរាល់ថ្ងៃនៅ ជិតកោះនេះ ក្នុងអំឡុងពេលបីឆ្នាំចុងក្រោយ។ ភាពតានតឹងក៏បានកើនឡើងនៅដើមឆ្នាំនេះ បន្ទាប់ពីប្រធានសភាអាម៉េរិក Nancy Pelosi បានធ្វើទស្សនកិច្ចទៅកាន់កោះតៃវ៉ាន់។ ក្រសួងការពារជាតិរបស់ តៃវ៉ាន់បាននិយាយនៅក្នុងសេចក្តីថ្លែងការណ៍មួយថា ការលក់ប្រព័ន្ធ Volcanoនេះ នឹងចូល ជាធរមានក្នុង រយៈពេលប្រហែលមួយខែ ហើយប្រព័ន្ធនេះនឹងជួយបង្កើនសមត្ថភាព “សង្គ្រាមមិនស៊ីមេទ្រី” របស់កោះនេះ ដើម្បីធ្វើឱ្យកងកម្លាំងរបស់ខ្លួនកាន់តែមានភាព រហ័សរហួនទប់ទល់ជាមួយចិនដីគោក។ តៃវ៉ាន់និយាយថា កាលពីថ្ងៃចន្ទ ប្រទេសចិនបាន បញ្ជូនយន្តហោះចម្បាំងរាប់សិបគ្រឿងមិនធ្លាប់មានរបស់ខ្លួនឆ្លងកាត់ខ្សែបន្ទាត់មធ្យមនៃច្រកសមុទ្រតៃវ៉ាន់ ដែលជាព្រំដែនសមុទ្រពិតប្រាកដរវាងប្រទេសទាំងពីរ៕
ប្រភព៖ ALJAZEERA
ប្រភពរូប៖ALJAZEERA
ប្រែសម្រួល៖សុខ តុលា