លោក Pele វីរបុរសបាល់ទាត់របស់ក្រុមជម្រើសជាតិប្រេស៊ីល ដែលបានងើបចេញពីភាពក្រីក្រដោយជើងទទេ ដើម្បីក្លាយជាអត្តពលិកដ៏អស្ចារ្យ និងល្បីល្បាញបំផុត ក្នុងប្រវត្តិសាស្ត្រសម័យទំនើប បានទទួលមរណភាពហើយ នៅថ្ងៃព្រហស្បតិ៍ (ទី២៩ ខែធ្នូ) ក្នុងវ័យ ៨២ឆ្នាំ។
មន្ទីរពេទ្យ Albert Einstein ក្នុងទីក្រុង Sao Paulo ជាកន្លែងដែលលោក Pele កំពុងទទួលការព្យាបាលនោះ បានឱ្យដឹងថា គាត់ស្លាប់នៅម៉ោង ៣:២៧នាទីរសៀល «ដោយសារតែការខូចខាតនៃសរីរាង្គជាច្រើន ដែលបណ្តាលមកពីការវិវឌ្ឍនៃជំងឺមហារីកពោះវៀនធំ ដែលទាក់ទងនឹងស្ថានភាពសុខភាពពីមុនរបស់គាត់»។
ការស្លាប់របស់បុគ្គលតែម្នាក់គត់ ដែលបានឈ្នះពានរង្វាន់ពីព្រឹត្តិការណ៍ World Cup ៣ដង ក្នុងនាមជាកីឡាករនោះ ត្រូវបានបញ្ជាក់អះអាងនៅលើគណនី Instagram របស់គាត់។
«ការជំរុញទឹកចិត្ត និងសេចក្តីស្រឡាញ់ គឺជាភ័ស្តុតាងនៃការធ្វើដំណើររបស់ King Pele (ស្តេច Pele) ដែលបានលាចាកលោកនេះដោយស្ងប់ស្ងាត់ នៅថ្ងៃនេះ»។ នេះជាសាររៀបរាប់លើគណនី Instagram នោះ ដោយបានបន្ថែមទៀតថា «គាត់បានធ្វើឱ្យពិភពលោកកាន់តែមានភាពស្រស់បំព្រងជាមួយនឹងទេពកោសល្យ ក្នុងវិស័យកីឡារបស់គាត់ បញ្ឈប់សង្រ្គាម ធ្វើការងារសង្គមទូទាំងពិភពលោក និងផ្សព្វផ្សាយនូវអ្វីដែលគាត់ជឿថា ជាការព្យាបាលនូវរាល់បញ្ហាទាំងអស់របស់យើង នោះគឺក្ដីស្រឡាញ់»។
ក្រោយមានការប្រកាសដំណឹងនេះ ការលើកសរសើរ បានកើតមានឡើងពីពិភពកីឡា នយោបាយ និងវប្បធម៌សម័យនិយម ចំពោះបុគ្គលដ៏ឆ្នើមមួយរូប ដែលបានជួយឱ្យក្រុមជម្រើសជាតិប្រេស៊ីលកា្លយជាគំរូនៃការលេងហ្គេមដ៏ស្រស់ស្អាត។
រដ្ឋាភិបាលរបស់លោកប្រធានាធិបតី Jair Bolsonaro ដែលត្រូវចេញពីតំណែង នៅថ្ងៃអាទិត្យបានប្រកាសកាន់ទុក្ខរយៈពេល ៣ថ្ងៃ ហើយបាននិយាយនៅក្នុងសេចក្តីថ្លែងការណ៍មួយថា លោក Pele គឺជា «ពលរដ្ឋ និងជាអ្នកស្នេហាជាតិដ៏អស្ចារ្យមួយរូប ដោយលើកឈ្មោះប្រទេសប្រេស៊ីល នៅគ្រប់ទីកន្លែង ដែលគាត់បានទៅ»។
សម្រាប់អ្នកស្នងតំណែងលោក Bolsonaro លោក Luiz Inacio Lula da Silva ដែលជាប្រធានាធិបតីជាប់ឆ្នោត បានសរសេរនៅលើគណនី Twitter ថា «ប្រជាជនប្រេស៊ីលតិចតួចប៉ុណ្ណោះ ដែលនាំយកឈ្មោះប្រទេសរបស់យើងទៅគ្រប់ទីកន្លែង ដូចដែលគាត់បានធ្វើ»។
ចំណែកឯប្រធានាធិបតីបារាំងលោក Emmanuel Macron ក៏បានពោលសរសើរដែរថា កេរដំណែលរបស់លោក Pele នឹងរស់នៅជារៀងរហូត ដោយលោកបានសរសេរ នៅលើបណ្ដាញសង្គម Twitter ថា «ហ្គេម (ការប្រកួត)។ ស្តេច។ ភាពស្ថិតស្ថេរជារៀងរហូត»៕
