ខ្សែប្រយុទ្ធ Erling Haaland បាននិយាយរអ៊ូរទាំដោយសោកស្ដាយ ដែលមិនអាចស៊ុតបញ្ចូលទីឱ្យបាន ៥គ្រាប់ ក្នុងការប្រកួត នៅទីក្រុងកំណើតរបស់ខ្លួន ខណៈដែលកីឡាករសញ្ជាតិន័រវែស ទម្លុះសំណាញ់ទីបាន ២ដង ក្នុងជ័យជម្នះ ៣-១ របស់ក្រុមមេឃខៀវ Manchester City នៅឯផ្ទះរបស់ក្រុម Leeds ដែលជាលទ្ធផលជួយរុញពួកគេឱ្យឡើងទៅកាន់ចំណាត់ថ្នាក់លេខ ២ ក្នុងតារាងពិន្ទុនៃក្របខ័ណ្ឌ Premier League។
កីឡាករ Haaland បានចំណាយពេលជាច្រើនឆ្នាំដំបូង នៅតំបន់ Yorkshire ខណៈដែលឪពុករបស់គេ លោក Alfe Inge បានប្រកបអាជីពជាមួយក្លិប Leeds ប៉ុន្តែក្នុងហ្គេមនេះ រូបគេមិនបានបង្ហាញពីក្តីមេត្តា ឬការយោគយល់នោះឡើយ ខណៈដែលក្រុម Man City នាំខ្លួនឯងឱ្យត្រឡប់មកកាន់ផ្លូវនៃការប្រកួតប្រជែងដណ្ដើមពានវិញ។
ក្រុមរបស់លោក Pep Guardiola បានវិលទៅឈរ ក្នុងគម្លាត ៥ពិន្ទុពីក្រុមកាំភ្លើង Arsenal ដែលកំពុងនាំមុខនៅទីកំពូលតារាង ខណៈដែលពួកគេធ្វើបានយ៉ាងប្រសើរឡើងវិញពីការរងបរាជ័យដ៏គួរឱ្យភ្ញាក់ផ្អើល ក្រោមស្នាដៃរបស់ក្រុម Brentford មុនពេលឈប់សម្រាក សម្រាប់ព្រឹត្តិការណ៍ World Cup។
កីឡាករ Haaland នាពេលនេះ រកបាន ២០គ្រាប់ហើយ នៅ Premier League ក្នុងចំណោមការបង្ហាញខ្លួន ១៤លើក តាំងពីមកចូលរួមជាមួយក្រុម Man City ប៉ុន្តែនៅតែមិនមានការពេញចិត្ត បន្ទាប់ពីមិនអាចឆ្លងផុតអ្នកចាំទី Illan Meslier របស់ក្រុម Leeds នៅពេលដាច់មួយទល់នឹងមួយចំនួន ៣លើក។
ក្រោយចប់ការប្រកួតនេះ Haaland បានប្រាប់បណ្ដាញាសារព័ត៌មាន Amazon Prime ថា៖ «ខ្ញុំគួរតែអាចរកបាន ៥គ្រាប់ នោះជាការពិត តែយ៉ាងណា ជ័យជម្នះរបស់យើង គឺជារឿងសំខាន់បំផុត។ ឥឡូវនេះ យើងឃើញហើយថា ក្រុម Arsenal ឈរនៅទីកំពូល ដូច្នេះ យើងត្រូវតាមប្រដេញពួកគេ ប៉ុន្តែសម្រាប់ខ្ញុំ ក្នុងនាមជាខ្សែប្រយុទ្ធ ខ្ញុំអាចស៊ុតបញ្ចូលទីបាន ២-៣គ្រាប់ទៀត។ នោះហើយជាជីវិត ខ្ញុំត្រូវតែប្រឹងប្រែងហ្វឹកហាត់បន្ថែមទៀត»។
ក្រុមភ្ញៀវ Man City មានគ្រាប់បាល់នាំមុខ នៅនាទីទី៤៥+១ ដែលស៊ុតបញ្ចូលទីដោយខ្សែបម្រើ Rodri មុននឹងកីឡាករ Haaland បន្ថែម ២គ្រាប់ផ្ទួនៗ នៅនាទីទី៥១ និង ៦៤។ ចំណែកគ្រាប់បាល់របស់ក្រុមម្ចាស់ផ្ទះ Leeds ធ្វើបានសម្រេចដោយខ្សែការពារ Pascal Struijk នៅនាទីទី៧៣៕
