ភ្នំពេញ៖លោក វ៉ី សំណាង អភិបាលខេត្តកំពង់ស្ពឺ បានថ្លែងថា៖ស្ថានភាពខេត្តកំពង់ស្ពឺក៏ដូចជាពលរដ្ឋខេត្តកំពង់ស្ពឺនាពេលបច្ចុប្បន្ន មិនដូចអតីតកាលទៀតនោះឡើយ។ ខេត្តកំពង់ស្ពឺ បច្ចុប្បន្នបានប្រែមុខមាត់ថ្មីមានការរីកចម្រើនខ្លាំង ហើយជីវភាពរបស់ប្រជាពលរដ្ឋក៏ល្អប្រសើរ មិនដូចពាក្យដំណៀលពីអតីតកាលទៀតនោះទេ។
ពីតំបន់ប្រយុទ្ធកាល ពីសម័យសង្គ្រាម មកដល់ពេលបច្ចុប្បន្ន កំពង់ស្ពឺបានប្រែក្លាយជាតំបន់ឧស្សាហកម្មយ៉ាងច្រើនកុះករដែលជាក់ ស្តែងមកដល់ពេលនេះ ខេត្តកំពង់ស្ពឺ មានរោងចក្របានបើកដំណើរការ និងកំពុងមានការទាក់ទង សុំបើកដំណើរការជាច្រើនកន្លែង។មិនមានការព្រួយបារម្ភរឿងខ្វះរោងចក្រឱ្យកម្មករធ្វើនោះទេ មានតែខ្លាចរឿងខ្វះកម្លាំងពលកម្មដើម្បីធ្វើការទៅវិញនោះទេ»។
បើតាមលោកអភិបាលខេត្ត បច្ចុប្បន្នខេត្តកំពង់ស្ពឺ មានរោងចក្រសរុបប្រមាណ ៣៨១រោងចក្រ។ តាមរយៈរោងចក្រទាំងនេះ បានផ្តល់ការងារជិត ១៦ម៉ឺននាក់ ដែលភាគច្រើនសុទ្ធសឹងជាពលរដ្ឋខេត្តកំពង់ស្ពឺ។ តាមរយៈវត្តមានរោងចក្រ សហគ្រាសទាំងនេះ បានក្លាយ ទៅជាការដ្ឋានការងារ និងជាប្រភពចំណូលសម្រាប់ប្រជាពលរដ្ឋ ហើយជួយជីវភាពរបស់ពួកគេកាន់តែល្អប្រសើរ៕ដោយៈសិរីមតី
