រដ្ឋាភិបាលរុស្ស៊ីបានសម្រេចអនុញ្ញាតឲ្យទាហានរបស់ខ្លួនដែលបានទៅប្រយុទ្ធនៅអ៊ុយក្រែនទាំងអស់មានសិទ្ធិរក្សាមេជីវិតទុកក្នុងឃ្លាំងវិទ្យាសាស្រ្ត ដើម្បីការពារការដាច់ពូជ គ្មានអ្នកបន្តត្រកូល។
![](https://cambodiaflashnews.com/wp-content/uploads/2021/06/top-banner.gif)
យោងតាមទីភ្នាក់ងារសារព័ត៌មានរដ្ឋ TASS របស់រុស្ស៊ីបានរាយការណ៍កាលពីថ្ងៃពុធ បានឲ្យដឹងថា ទាហានរុស្ស៊ីដែលត្រូវបានប្រមូលផ្តុំទៅប្រយុទ្ធនៅអ៊ុយក្រែនគ្រប់រូប នឹងមានសិទ្ធិទទួលបានការរក្សាទុកនូវមេជីវិតឈ្មោលរបស់ពួកគេដោយឥតគិតថ្លៃនៅក្នុងឃ្លាំងវិទ្យាសាស្រ្ត។ ដោយដកស្រង់សម្តីលោក Igor Trunov ជាប្រធានសហភាពមេធាវីរុស្ស៊ី ប្រភពដដែលបានរាយការណ៍បន្តថា ក្រសួងសុខាភិបាលនៃប្រទេសរុស្ស៊ីក៏បានឆ្លើយតបយល់ព្រមទៅនឹងការអំពាវនាវសម្រាប់ជំនួយថវិកាសម្រាប់ទាហានណាដែលចង់ទទួលបានសេវាបែបនេះផងដែរ។ របាយការណ៍នៃការបង្កកមេជីវិតឈ្មោលនេះ បានលេចឡើងជាលើកដំបូងតាំងពីខែតុលាមកម្ល៉េះ តាមរយៈកាសែត Moskovskij Komsomolets របស់ប្រទេសរុស្ស៊ី ដែលនិយាយថាមានការគាំទ្រពីសំណាក់លោកពូទីនផ្ទាល់តែម្តង។ អ្នកគាំទ្រវិមានក្រឹមឡាំងបានបញ្ចេញមតិថា ឥឡូវនេះ បុរសដែលមានសុខភាពល្អអាចបង្កកមេជីវិតឈ្មោលរបស់ពួកគេទុក ក្នុងករណីមានអ្វីមួយកើតឡើងចំពោះពួកគេ លទ្ធភាពក្នុងការក្លាយជាឪពុកក៏នៅតែមាន។
យ៉ាងណាក៏ដោយ ឧត្តមសេនីយ៍អាម៉េរិក Mark Milley បានប៉ាន់ប្រមាណកាលពីខែវិច្ឆិកាថា ទាហានរុស្ស៊ីប្រហែល ១០០.០០០ នាក់ត្រូវបានសម្លាប់ ឬរងរបួសចាប់តាំងពីការឈ្លានពានខែកុម្ភៈ។ លោកក៏បាននិយាយដែរថា កងកម្លាំងប្រដាប់អាវុធរបស់ក្រុងកៀវខាងអ៊ុយក្រែនក៏ “ប្រហែលជា” បានរងគ្រោះស្រដៀងគ្នានេះដែរ៕
ប្រភព៖ ALJAZEERA
ប្រភពរូប៖ALJAZEERA
ប្រែសម្រួល៖សុខ តុលា