ក្រចេះ៖ បុរស២នាក់ជិះម៉ូតូឌុបគ្នាក្នុងល្បឿនលឿនទៅបុកគោយន្តកន្ត្រៃដឹកឈើពីក្រោយពេញទំហឹងបណ្តាលឱ្យស្លាប់ម្នាក់ និងរបួសធ្ងន់ម្នាក់ ហើយម៉ូតូបានឆេះខ្ទេច។គ្រោះថ្នាក់ចរាចរនេះបានកើតឡើងនៅលើផ្លូវជាតិលេខ៧ ម្តុំអូរអណ្តាស់ ភូមិអូរគ្រៀង ស្រុកសំបូរ ខេត្តក្រចេះ កាលពីព្រលប់ថ្ងៃទី២៨ ខែធ្នូ។
មន្ត្រីនគរបាលស្រុកសំបូរបានឱ្យដឹងថា ហេតុការណ៍នេះរវាងម៉ូតូបុកគោយន្តកន្ត្រៃពីក្រោយពេញទំហឹងបណ្តាលឱ្យស្លាប់ម្នាក់និងរងរបួសធ្ងន់ម្នាក់។
ម៉ូតូម៉ាកហុងដាឌ្រីម អ្នកបើកបរឈ្មោះសាហ្វី អី អាយុ ៤១ឆ្នាំ ខ្មែរអ៊ិស្លាមបានស្លាប់ភ្លាមនិងអ្នករួមដំណើរឈ្មោះវណ្ដា វ៉ាឃីន អាយុ១៤ឆ្នាំ រងរបួសធ្ងន់។ទាំង២នាក់នៅភូមិវិហារសំបូរ ឃុំរកាពរប្រាំ ស្រុកត្បូងឃ្មុំ ខេត្តត្បូងឃ្មុំ។
មុនកើតហេតុជនរងគ្រោះបើកម៉ូតូក្នុងល្បឿនលឿនបានបុកគោយន្តកន្រ្តៃពីក្រោយពេញទំហឹង។ខាងគោយន្តឈ្មោះខេន យ៉ោន អាយុ៤៧ឆ្នាំ និងអ្នករួមដំណើឈ្មោះហ៊ៅ អាយុ៤៤ឆ្នាំ នៅភូមិកោះខ្ញែរ ឃុំអូរគ្រៀង ស្រុកសំបូរ ខេត្តក្រចេះ ។
ករណីនេះបានបណ្តាលឱ្យម៉ូតូត្រូវភ្លើងឆេះអស់ទាំងស្រុងសល់តែគ្រោងដែក។ចំណែកគោយន្តខូចខូចខាតបន្តិចបន្តួច។ក្រោយមកសមត្ថកិច្ចបានយកមធ្យោបាយទាំង២គ្រឿងទៅទុកនៅប៉ុស្តិ៍នគរបាលរដ្ឋបាលអូរគ្រៀងដើម្បីដោះស្រាយពេលក្រោយ៕ដោយ៖វីរ