ក្រុមបិសាចក្រហម Manchester United បានចាប់ផ្តើមយ៉ាងវិជ្ជមាន ចំពោះជីវិត ដែលមិនមានស៊ុបភើស្តារ Cristiano Ronaldo ខណៈដែលខ្សែប្រយុទ្ធ Marcus Rashford និង Anthony Martial បានចាកចេញពីស្រមោលរបស់កីឡាករសញ្ជាតិព័រទុយហ្គាល់ ហើយមកស៊ុតបញ្ចូលទី ក្នុងជ័យជម្នះ ៣-០ លើក្រុម Nottingham Forest កាលពីថ្ងៃអង្គារ។
![](https://cambodiaflashnews.com/wp-content/uploads/2021/06/top-banner.gif)
ប៉ុន្តែអ្នកចាត់ការក្រុម លោក Erik ten Hag នៅតែកំណត់គោលដៅស្វែងរកខ្សែប្រយុទ្ធ ដើម្បីយកមកជំនួសកីឡាករ Ronaldo ក្នុងទីផ្សារដោះដូរ ដើម្បីធ្វើឱ្យបិសាចក្រហមកាន់តែមានភាពមុតស្រួច នៅតំបន់ប្រយុទ្ធ។
ភាពមិនច្បាស់លាស់ នៅដំណាក់កាលទី ២ របស់កីឡាករ Ronaldo នៅទឹកដី Old Trafford បានបញ្ចប់សព្វគ្រប់ អំឡុងការឈប់សម្រាក សម្រាប់ព្រឹត្តិការណ៍ World Cup បន្ទាប់ពីរូបគេ បានផ្ដល់បទសម្ភាសន៍ប្រកបដោយបកំហឹងមួយ ដែលផ្តោតទៅលើលោក Ten Hag និងម្ចាស់ក្លិប។
កីឡាករ Rashford មានការផ្លាស់ប្ដូរគួរឱ្យកត់សម្គាល់ នៅក្រោមការដឹកនាំរបស់លោក Ten Hag ដោយរូបគេបាននាំយកទម្រង់លេងដ៏ល្អរបស់ខ្លួន ដែលលេងឱ្យក្រុមអង់គ្លេស នៅ World Cup មកបង្ហាញក្នុងក្របខ័ណ្ឌ Premier League ដែលទើបចាប់ផ្ដើមឡើងវិញនេះ។
លោក Ten Hag បានប្រាប់បណ្ដាញសារព័ត៌មាន Amazon Prime ថា៖ «កីឡាកររបស់យើងពិតជាធ្វើបានល្អណាស់ ក្នុងការប្រកួតប្រជែង នៅ World Cup។ ខ្ញុំសប្បាយចិត្ត ដែលបានឃើញទម្រង់លេងនោះ ហើយឥឡូវនេះពួកគេបន្តធ្វើបែបហ្នឹងទៀត។ ពួកគេត្រូវតែបន្តកម្រិតនោះទៅមុខទៀត ហើយធ្វើឱ្យវាកាន់តែប្រសើរ ពីមួយហ្គេមទៅមួយហ្គេម»។
កីឡាករ Rashford វ័យ ២៥ឆ្នាំ គឺជាអ្នករកបាននូវគ្រាប់បាល់បើកឆាក ហើយបន្ទាប់មក បានរួមចំណែកបញ្ជូនឱ្យកីឡាករ Martial ទម្លុះសំណាញ់ទី ដើម្បីបន្ថែមការនាំឱ្យក្រុម Man Utd នៅវគ្គទី ១ មុនពេលខ្សែបម្រើ Fred បានជួយធានានូវជ័យជម្នះ សម្រាប់ក្រុមម្ចាស់ផ្ទះ នៅចុងម៉ោងនៃការប្រកួតទី១ របស់ខ្លួននេះ ក្រោយឈប់សម្រាក ៦សប្ដាហ៍។
ការដណ្ដើមបាន ៣ពិន្ទុនេះ នាំឱ្យក្រុម Man Utd នៅតែបន្តឈរក្នុងចំណាត់ថ្នាក់លេខ ៥ ដោយមាន ២៩ពិន្ទុ ហើយមានគម្លាតតែ ១ពិន្ទុប៉ុណ្ណោះពីក្រោមក្រុមលេខ ៤ Tottenham Hotspur ដែលលេងលើស ១ហ្គេម៕