រដ្ឋាភិបាលរុស្ស៊ីបានប្រកាសថា នឹងបិទការនាំចេញប្រេងនៅឆ្នាំ២០២៣ ក្នុងរយៈពេលយូរតែម្តងសម្រាប់ប្រទេសណាដែលបានធ្វើបាបរុស្ស៊ី កំណត់បន្ទាបតម្លៃប្រេងខ្លួន។
![](https://cambodiaflashnews.com/wp-content/uploads/2021/06/top-banner.gif)
មិនបានប៉ុន្មានបន្ទាប់ពីក្រុមហ៊ុនថាមពលជាតិរុស្ស៊ីទើបបានប្រកាសជូនដំណឹងពីការកាត់បន្ថយការនាំចេញប្រេងសោះ ទីបំផុតប្រធានាធិបតីរុស្ស៊ី លោក វ្ល៉ាឌីមៀរ ពូទីន កាលពីថ្ងៃអង្គារ ទី២៧ខែធ្នូ ស្រាប់តែបានចុះហត្ថលេខាលើក្រឹត្យហាមឃាត់ការលក់ប្រេង និងផលិតផលប្រេងតែម្តងដល់ប្រទេសនានាដែលចូលរួមក្នុងការកំណត់តម្លៃប្រេងរុស្ស៊ីនាដើមខែធ្នូហើយ។ ក្រឹត្យរបស់វិមានក្រឹមឡាំងបានបញ្ជាក់ថា៖ “វានឹងចូលជាធរមាននៅថ្ងៃទី១ ខែកុម្ភៈ ឆ្នាំ ២០២៣ ហើយនឹងបន្តអនុវត្តរហូតដល់ថ្ងៃទី ១ ខែកក្កដា ឆ្នាំ ២០២៣”។ ការហាមឃាត់នេះ ក្រឹត្យមិនបានរៀបរាប់ឈ្មោះប្រទេសណាមួយចំៗនោះទេ ខណៈកាលពីដើមខែធ្នូ ប្រទេសនៃសហភាពអឺរ៉ុបជាច្រើន ព្រមទាំងអូស្រ្តាលីក្តី សុទ្ធតែបានចូលរួមកំណត់តម្លៃប្រេងរុស្ស៊ីចុះសល់ត្រឹម ៦០ដុល្លារក្នុងមួយបារែល។
បើទោះជាយ៉ាងណា ប្រធានាធិបតីពូទីនបាននិយាយថា ក្រឹត្យក៏នឹងលើកលែងក្នុងករណីពិសេសណាមួយ ខណៈដែលកាលបរិច្ឆេទដែលប្រុងនៅថ្ងៃទី ១ខែកុម្ភៈអាចនឹងមានការផ្លាស់ប្តូរអាស្រ័យលើស្ថានភាពជាក់ស្តែង។ យោងតាមទីភ្នាក់ងារថាមពលអន្តរជាតិ (IEA) បានឱ្យដឹងថា ប្រទេសរុស្ស៊ីគឺជាប្រទេសនាំចេញប្រេង និងផលិតផលប្រេងដ៏ធំបំផុតទៅកាន់សហភាពអឺរ៉ុប ដោយផ្គត់ផ្គង់ប្រេងប្រហែល ២,២ លានបារ៉ែលក្នុងមួយថ្ងៃ និងផលិតផលប្រេង ១,២ លានបារ៉ែលក្នុងមួយថ្ងៃ៕
ប្រភព៖ ALJAZEERA
ប្រភពរូប៖ALJAZEERA
ប្រែសម្រួល៖សុខ តុលា