ខ្សែការពារកណ្តាល Harry Maguire របស់ក្រុមបិសាចក្រហម Manchester United ត្រូវបានរំពឹងថា នឹងត្រឡប់មកជួយក្រុមវិញ សម្រាប់ការប្រកួត នៅក្របខ័ណ្ឌ Premier League នាថ្ងៃអង្គារ (ថ្ងៃទី២៧ ខែធ្នូ) នៅផ្ទះរបស់ខ្លួនទល់នឹងក្រុម Nottingham Forest បន្ទាប់ពីខកខានការប្រកួតចុងក្រោយ ដោយសារមានជំងឺ។
កីឡាករអន្តរជាតិអង់គ្លេស Maguire មិនមានវត្តមាននោះទេ ក្នុងជ័យជម្នះ ២-០ របស់ក្រុម Man United លើក្រុម Burnley កាលពីសប្តាហ៍មុន ដែលជាលទ្ធផលជួយឱ្យដណ្ដើមបានកៅអីមួយ ក្នុងវគ្គ ១/៤ ផ្តាច់ព្រ័ត្រនៃកម្មវិធី League Cup។
អ្នកចាត់ការរបស់ក្រុម លោក Erik ten Hag បានប្រាប់ប្រព័ន្ធផ្សព្វផ្សាយរបស់ក្លិបថា៖ «យើងមានបញ្ហាមួយចំនួនជាមួយនឹងជំងឺ ដូចជាកីឡាករ Harry Maguire ជាដើម ប៉ុន្តែរូបគេបានត្រឡប់មកកាន់ទីលានហ្វឹកហាត់វិញហើយ (កាលពីថ្ងៃសុក្រ) ដូច្នេះ ខ្ញុំសប្បាយចិត្តជាមួយនឹងរឿងនោះ»។
ចំណែកឯខ្សែការពារសញ្ជាតិអាហ្សង់ទីន Lisandro Martinez និង Raphael Varane របស់ក្រុមជម្រើសជាតិបារាំង មិនឈ្មោះទេ ព្រោះពួកគេមិនទាន់បានត្រឡប់មកវិញនោះឡើយ បន្ទាប់ពីលេងក្នុងវគ្គផ្តាច់ព្រ័ត្រ នៅឯព្រឹត្តិការណ៍ World Cup ហើយលោក Ten Hag បាននិយាយថា កីឡាកររបស់ក្រុម Man United ផ្សេងទៀត ដែលបានទៅចូលរួមលេងនៅប្រទេសកាតា កំពុងស្ថិតក្នុងការមានកម្លាំងចិត្តល្អ។
គ្រូបង្វឹកសញ្ជាតិហូឡង់ បាននិយាយថា៖ «(ពួកគេមាន) ចំណាប់អារម្មណ៍យ៉ាងខ្លាំង នៅទីនោះ (ប្រទេសកាតា) ប៉ុន្តែឥឡូវនេះពួកគេត្រឡប់មកវិញហើយ ហើយយើងទទួលបានអារម្មណ៍នូវការមានថាមពលរបស់ពួកគេ។ ពួកគេកំពុងទន្ទឹងរង់ចាំការចាប់ផ្តើមឡើងវិញ (នៃ Premier League)»។
«កីឡាករ Rapha Varane និង Licha Martinez ពួកគេមិនទាន់មានវត្តមានទេ ប៉ុន្តែយើងសង្ឃឹមថា ពួកគេនឹងត្រឡប់មក (ឆាប់ៗនេះ)»។ លោក Ten Hag បានបញ្ជាក់បន្ថែម។
ក្រុម Man United កំពុងឈរនៅចំណាត់ថ្នាក់លេខ ៥ ក្នុងតារាងពិន្ទុរបស់ក្របខ័ណ្ឌ Premier League ដោយមាន ២៦ពិន្ទុ បន្ទាប់ពីឆ្លងកាត់ការប្រកួត ១៤លើក ហើយមានគម្លាត ៤ពិន្ទុពីក្រោយក្រុមលេខ ៤ Tottenham Hotspur ដែលលេងច្រើនជាង ២ហ្គេម៕
