ក្រុមហង្សក្រហម Liverpool ទំនងជាឈ្នះការប្រជែង ដើម្បីចុះហត្ថលេខាផ្ទេរយកខ្សែប្រយុទ្ធអន្តរជាតិហូឡង់ Cody Gakpo បន្ទាប់ពីក្លិប PSV Eindhoven បានប្រកាសពីការឈានដល់កិច្ចព្រមព្រៀងជាមួយក្លិបយក្សអង់គ្លេស កាលពីថ្ងៃចន្ទ។
![](https://cambodiaflashnews.com/wp-content/uploads/2021/06/top-banner.gif)
កីឡាករ Gakpo ដែលស៊ុតបញ្ចូលទីបាន ៣គ្រាប់ នៅឯព្រឹត្តិការណ៍ World Cup ឱ្យក្រុមពណ៌ទឹកក្រូចហូឡង់ នៅមុននេះ ត្រូវបានផ្សារភ្ជាប់ជាមួយនឹងការផ្លាស់ទៅក្លិបគូប្រជែងរបស់ក្រុម Liverpool គឺក្រុមបិសាចក្រហម Manchester United។
ក្លិប PSV បានឱ្យដឹងនៅក្នុងសេចក្តីថ្លែងការណ៍មួយថា៖ «ក្លិប PSV និងក្លិប Liverpool FC បានឈានដល់កិច្ចព្រមព្រៀងមួយស្តីពីការផ្ទេរដែលបានស្នើមក ចំពោះកីឡាករ Cody Gakpo។ ខ្សែប្រយុទ្ធវ័យ ២៣ឆ្នាំ នឹងចាកចេញទៅប្រទេសអង់គ្លេស ក្នុងពេលឆាប់ៗនេះ ជាកន្លែងដែលរូបគេនឹងត្រូវបំពេញបែបបទចាំបាច់គ្រប់យ៉ាង មុននឹងបញ្ចប់ការផ្ទេរ»។
អ្នកចាត់ការរបស់ក្រុម PSV លោក Marcel Brands បាននិយាយថា តម្លៃផ្ទេរនឹងក្លាយជាកំណត់ត្រាក្នុងក្លិប សម្រាប់ក្លិបរបស់ប្រទេសហូឡង់មួយនេះ ដោយយោងតាមសេចក្ដីរាយការណ៍ តម្លៃនេះអាចកើនឡើងដល់ ៥០លានអឺរ៉ូ (៥៣លានដុល្លារ)។
ក្រុម Liverpool សង្ឃឹមថា ការមកដល់របស់កីឡាករ Gakpo នឹងជាការស្តារឡើងវិញបន្ថែមទៀត សម្រាបតំបន់ប្រយុទ្ធរបស់ក្រុម បន្ទាប់ពីការចុះហត្ថលេខាយកកីឡាករ Luis Diaz និង Darwin Nunez កាលពីឆ្នាំមុន។
ក្រុមហង្សក្រហមឈរនៅលេខរៀងទី៦ ក្នុងតារាងពិន្ទុនៃក្របខ័ណ្ឌ Premier League ដោយមានគម្លាត ៥ពិន្ទុ នៅក្រៅចំណោមក្រុមទីកំពូលទាំង ៤ ដែលជាចំណាត់ថ្នាក់ជួយធានានូវសិទ្ធ ក្នុងការបានទៅចូលរួមក្របខ័ណ្ឌ Champions League បន្ទាប់ពីការចាប់ផ្តើមរដូវកាលមិនបានល្អគ្រប់គ្រាន់។
ប៉ុន្តែក្រុមរបស់លោក Jurgen Klopp ទទួលបានជ័យជម្នះជាលើកទី៣ ជាប់ៗគ្នា ដោយការយកឈ្នះ ៣-១ លើក្រុមម្ចាស់ផ្ទះ Aston Villa នៅថ្ងៃវិលត្រឡប់នៃការប្រកួតប្រជែងរបស់ក្របខ័ណ្ឌ Premier League កាលពីថ្ងៃចន្ទ បន្ទាប់ពីការឈប់សម្រាក សម្រាប់ព្រឹត្តិការណ៍ World Cup៕