ក្រុមកាំភ្លើងធំ Arsenal បានបន្លាយការនាំមុខរហូតដល់ ៧ពិន្ទុជាមួយនឹងជ័យជម្នះ ៣-១ លើក្រុម West Ham ខណៈដែលក្របខ័ណ្ឌ Premier League បានត្រឡប់មកវិញ កាលពីថ្ងៃចន្ទ ហើយក្រុម Newcastle បានរំកិលឡើងមកលេខ ២ ក្រោយដណ្ដើមជ័យជម្នះដ៏គួរឱ្យចាប់អារម្មណ៍ ៣-០ នៅឯទឹកដីរបស់ក្រុម Leicester។
ជាមួយគ្នានេះ សម្រាប់ការប្រកួត នៅថ្ងៃវិលត្រឡប់ពីការឈប់សម្រាក សម្រាប់ព្រឹត្តិការណ៍ World Cup នេះ ក្រុមហង្សក្រហម Liverpool ក៏រកបាន ៣ពិន្ទុដែរ ដោយបានយកឈ្នះក្រុម Aston Villa ៣-១ ហើយខ្សែប្រយុទ្ធ Harry Kane ធ្វើបានយ៉ាងប្រសើរ ក្រោយសោកសៅខូចចិត្ត នៅប្រទេសកាតា ដោយការស៊ុតបញ្ចូលទីបាន ១គ្រាប់ ក្នុងលទ្ធផលស្មើ ២-២ របស់ Tottenham Hotspur នៅឯផ្ទះរបស់ក្រុម Brentford។
សន្ទុះរបស់ក្រុម Arsenal ក្នុងការឆ្ពោះទៅរកការឈ្នះជើងឯកលីគជាលើកដំបូង គិតចាប់តាំងពីឆ្នាំ២០០៤ អាចត្រូវបានរំខានដោយការឈប់សម្រាកពាក់កណ្តាលរដូវកាលរយៈពេល ៦សប្តាហ៍ ប៉ុន្តែក្រុមរបស់លោក Mikel Arteta បានឆ្លងផុតដំណាក់កាលសាកល្បងមួយទៀតនៃការតាំងចិត្តរបស់ពួកគេ បន្ទាប់ពីតបតបានយ៉ាងល្អនឹងការនាំមុខ ១-០ ក្នុងវគ្គទី១ ដោយសារការទាត់បាល់ពិន័យ ១១ម៉ែត្រពីកីឡាករ Said Benrahma របស់ក្រុមភ្ញៀវ West Ham។
២គ្រាប់ ក្នុងរយៈពេល ៥នាទីពីខ្សែបម្រើ Bukayo Saka និង Gabriel Martinelli បានកែប្រែហ្គេម នៅទឹកដី Emirates មុនពេលខ្សែប្រយុទ្ធ Eddie Nketiah ធ្វើបានយ៉ាងប្រសើរ នៅថ្ងៃអវត្តមាននៃកីឡាករ Gabriel Jesus ដែលមានរបួស ដោយការទម្លុះសំណាញ់ទី ដើម្បីធានាជ័យជម្នះឱ្យក្រុមម្ចាស់ផ្ទះ។
លោក Arteta បាននិយាយក្រោយចប់ការប្រកួតថា៖ «ខ្ញុំរីករាយនឹងលទ្ធផល និងទ្រង់លេងរបស់ក្រុម។ យើងបានស៊ុតបញ្ចូលទី ក្នុងពេលវេលាយ៉ាងល្អឥតខ្ចោះ ហើយក្រុមអ្នកគាំទ្រ គឺពិសេសអស្ចារ្យ សូម្បីក្នុងពេលដែលយើងត្រូវគេនាំមុខ។ ពួកគេនៅតែបន្តមានជំនឿចិត្ត។ នៅពេលដែលយើងស៊ុតបញ្ចូលទីបាន សំឡេងលើកទឹកចិត្តបានលាន់ឮកងរំពងយ៉ាងខ្លាំង ហើយយើងបានបង្កើនសន្ទុះ ដែលយើងត្រូវការ»។
ដូច្នេះ ក្រុមកាំភ្លើងធំ ក្រោយបញ្ចប់ការប្រកួតសប្ដាហ៍ទី ១៥ របស់ខ្លួន នៅបន្តឈរទីកំពូលតារាងនៃក្របខ័ណ្ឌ Premier League ដោយមាន ៤០ពិន្ទុ ក្រុម Newcastle ក្រោយ ១៦សប្ដាហ៍ មាន ៣៣ពិន្ទុ នៅលេខ ២ ខណៈក្រុមជើងឯកចាស់ Manchester City នៅលេខ ៣ មាន ៣២ តែលេងទើបបាន ១៤សប្ដាហ៍ ហើយក្រុមលេខ ៤ Tottenham មាន ៣០ពិន្ទុ តែប្រកួតលើស ២ដង លើក្រុមលេខ ៥ Manchester United ដែលមាន ២៦ពិន្ទុ និងដែលត្រូវធ្វើម្ចាស់ផ្ទះទទួលក្រុម Nottingham Forest នាថ្ងៃអង្គារនេះ៕
