ភ្នំពេញ៖ឡេលាបខ្លួនម៉ាក BLACK SHEEP Body Lottion ក្លែងក្លាយ កែច្នៃវេចខ្ចប់នៅក្នុងស្រុក បន្លំប្រភពដើមដែលមានរោងចក្រនៅប្រទេសថៃ ប្រមាណជាង៦តោន ត្រូវបានកម្លាំងសមត្ថកិច្ចបង្ក្រាបបាននៅទីតាំងផ្ទះល្វែងនៅបុរីពិភពថ្មីកំបូល៣ ភូមិត្រពាំងសុក្រំ ឃុំបែកចាន ស្រុកអង្គស្នួល ខេត្តកណ្តាល។
ប្រតិបត្តិការបង្ក្រាបទីតាំងនាំចូល ផលិត ស្តុកទុក និងចែកចាយផលិតផលគ្រឿងសម្អាងនេះធ្វើឡើងដោយគណៈកម្មាធិការប្រយុទ្ធប្រឆាំងផលិតផលក្លែងក្លាយ (គ.ប.ផ.ក.) សហការជាមួយស្ថាប័នជំនាញពាក់ព័ន្ធ និងមានការសម្របសម្រួលនីតិវិធី ពីស្ថាប័នអយ្យការអមសាលាដំបូងខេត្តកណ្តាល នៅថ្ងៃទី២១ ខែធ្នូ ឆ្នាំ២០២២។
នាយឧត្តមសេនីយ៍ មៀច សុផាន់ណា ប្រធានគណៈកម្មាធិការប្រយុទ្ធប្រឆាំងផលិតផលក្លែងក្លាយក្នុងសន្និសីទសារព័ត៌មាននៅរសៀល ថ្ងៃទី២៦ខែធ្នូ ឆ្នាំ២០២២បានឲ្យដឹងថា៖ករណីឡេលាបខ្លួនក្លែងក្លាយជាង៦តោននេះ អាចចាត់ទុកថាជាប្រវត្តិសាស្ត្រមួយ។
លោកនាយឧត្តមសេនីយ៍ បានឲ្យដឹងថា៖ ក្នុងប្រតិបត្តិការបង្ក្រាបទីតាំងនេះ កម្លាំងចម្រុះរបស់គណៈកម្មាធិការ (គ.ប.ផ.ក.) បានរកឃើញផលិតផលគ្រឿងសម្អាងជាច្រើនតោន រួមមាន៖
*ទី១៖ លួចផលិត ស្តុកទុក និងចែកចាយផលិតផលគ្រឿងសម្អាង (ឡេ) ម៉ាក BLACK SHEEP BODY LOTION ក្លែងក្លាយ គ្មានបទដ្ឋានបច្ចេកទេស និងគ្មានច្បាប់អនុញ្ញាតពីក្រសួងសុខាភិបាល
*ទី២៖ លួចក្លែងបន្លំប្រភព នៃការផលិតឡេម៉ាក BLACK SHEEP BODY LOTION ជាផលិតផលរបស់ប្រទេសថៃ ដែលលួចផលិត ដោយយកវត្ថុធាតុដើមដូចជា ផលិតផលឱសថ និងគ្រឿងសម្អាងក្លែងក្លាយ មកលាយផ្សំបញ្ចូលគ្នា ដើម្បីផលិតកែច្នៃគុណភាពផលិត ផលគ្រឿងសម្អាង(ឡេ)ម៉ាក BLACK SHEEP BODY LOTION ក្លែងក្លាយដែលខុសពីផលិតផលពិត(ទំនិញសុទ្ធ) ម៉ាក BLACK SHEEP BODY LOTION (ឡេ) ដែលបានផលិតនៅប្រទេសថៃ
*ទី៣៖ លួចប្រើប្រាស់បុគ្គលិកចំនួន២៣នាក់ ដែលក្នុងចំណោមបុគ្គលិកទាំងនោះ មានបុគ្គលិក មួយចំនួនជាអនីតិជនមិនទាន់គ្រប់អាយុក្នុងការបម្រើការងារដែលខុសនឹងច្បាប់ របស់ក្រសួងការងារ និងបណ្តុះបណ្តាលវិជ្ជាជីវៈ។
បើតាមនាយឧត្តមសេនីយ៍ មៀច សុផាន់ណា ដោយមានគោលការណ៍ដឹកនាំពី សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ដ្រីក្រសួងមហាផ្ទៃ បានជំរុញឲ្យគណៈកម្មាធិការប្រយុទ្ធប្រឆាំងផលិតផលក្លែងក្លាយ (គ.ប.ផ.ក.) បន្តអនុវត្តការងារឲ្យមានប្រសិទ្ធិខ្ពស់ដូចមានខាងក្រោម៖
*ទី១៖ អនុវត្តប្រកាសរួមរវាងក្រសួងមហាផ្ទៃ និងក្រសួងសុខាភិបាល ដែលមានគណៈកម្មាធិការ (គ.ប.ផ.ក.) ជាសេនាធិការ ជូនក្រសួងមហាផ្ទៃ
*ទី២៖ ស្រាវជ្រាវ ស៊ើបអង្កេតទីតាំង និងជនប្រព្រឹត្តបទល្មើសផលិតផលក្លែងក្លាយ-ខុសច្បាប់ ក្នុងប្រទេសកម្ពុជា
*ទី៣៖ សហការជាមួយក្រសួងសុខាភិបាល និងអាជ្ញាធរមានសមត្ថកិច្ចនានា ដើម្បីចុះផ្សព្វផ្សាយអប់រំ ណែនាំអំពីសុវត្ថិភាព នៃផលិតផលវេជ្ជសាស្ត្រ ឱសថសាស្ត្រ អាហារបំប៉ន និងគ្រឿងសម្អាង
*ទី៤៖បន្តធ្វើសកម្មភាព និងប្រតិបត្តិការ ដើម្បីសុវត្ថិភាពនិងសុខភាពសាធារណៈ ដើម្បីជាគុណប្រយោជន៍សម្រាប់ប្រជាពលរដ្ឋកម្ពុជា។
នាយឧត្តមសេនីយ៍ បានបញ្ជាក់ថា ដោយឃើញថា ទីតាំងប្រព្រឹត្តខុសច្បាប់នេះ មិនអនុលោមតាមច្បាប់ នៃព្រះរាជាណាចក្រកម្ពុជាព្រះរាជអាជ្ញាសម្រេចឲ្យបិទទីតាំង ដោយផ្អាកអាជីវកម្មជាបណ្ដោះអាសន្ន និងកសាងសំណុំរឿងបញ្ជូនទៅអយ្យការអមសាលាដំបូងខេត្តកណ្តាលដើម្បីអនុវត្តតាមនីតិវិធីច្បាប់។
គណៈកម្មាធិការ (គ.ប.ផ.ក.) សូមអំពាវនាវដល់សាធារណៈជនទាំងអស់មេត្តាប្រុងប្រយ័ត្ន និងបញ្ឈប់រាល់ការទិញផលិតផលឡែក្លែងក្លាយម៉ាក BLACK SHEEP BODY LOTIONពីបណ្តាញសង្គមហ្វេសប៊ុក (Facebook) ទាំងនេះ៖ Facebook Account៖ Bella, Facebook Page៖ ប្រេនBlack Sheep (Ceo Bella) និង Facebook Page លេចៀម Black Sheep បានផ្សព្វផ្សាយនិងលក់ចែកចាយផលិតផលម៉ាកក្លែងក្លាយខាងលើដែលអាចបង្កគ្រោះថ្នាក់ដ៏ធ្ងន់ធ្ងរ ដល់សុខភាពអ្នកប្រើប្រាស់។
គណៈកម្មាធិការ បានកត់សម្គាល់ថា មានជនខិលខូចមួយចំនួនបានកំពុងលួចផលិត ស្តុកទុក និងចែកចាយផលិតផលគ្រឿងសម្អាងក្លែងក្លាយស្របពេលដែលអ្នកប្រើប្រាស់កំពុងមានតម្រូវការប្រើប្រាស់ច្រើន ជាហានិភ័យងាយរងផលប៉ះពាល់ដល់សុខភាពប្រជាពលរដ្ឋផងដែរគណៈកម្មាធិការនឹងបន្តតាមដានស្រាវជ្រាវលើកិច្ចការងារនេះបន្ថែមទៀត ដើម្បីនាំជនល្មើលពាក់ព័ន្ធឲ្យទទួលខុសត្រូវតាមច្បាប់៕ដោយៈផាវី