យោធាកូរ៉េខាងត្បូងកាលពីល្ងាចថ្ងៃចន្ទទី ២៦ ខែធ្នូ ឆ្នាំ២០២២ បានបាញ់ទម្លាក់យន្តហោះគ្មានមនុស្សបើកកូរ៉េខាងជើង១គ្រឿង ក្នុងពេលហោះចូលរំលោភដែនអាកាស។
យោងតាមក្រសួងការពារជាតិរបស់កូរ៉េខាងត្បូងបានឱ្យដឹងថា ការបាញ់ទម្លាក់បានធ្វើឡើងនៅរសៀលថ្ងៃចន្ទ បន្ទាប់ពីយន្តហោះគ្មានមនុស្សបើករបស់កូរ៉េខាងជើងចំនួន ៥ គ្រឿងបានឆ្លងចូលទៅក្នុងដែនអាកាសកូរ៉េខាងត្បូង ខណៈយោធាបានបញ្ចេញយន្តហោះចម្បាំង និងឧទ្ធម្ភាគចក្រវាយប្រហារឆ្លើយតប ជាលទ្ធផលយន្តហោះគ្មានមនុស្សបើកកូរ៉េខាងជើង១គ្រឿងត្រូវបានបាញ់ទម្លាក់។ ក្នុងការរំលោភដែនអាកាសនោះ លោក Lee Seung-oh មន្ត្រីការពារជាតិកូរ៉េខាងត្បូង បានលម្អិតថា យន្តហោះគ្មានមនុស្សបើកចំនួន ៤ គ្រឿងបានហោះជុំវិញកោះ Ganghwa និងមួយគ្រឿងបានហោះពីលើដែនអាកាសភាគខាងជើងនៃរដ្ឋធានីសេអ៊ូល។ លោក Lee ថ្លែងក្នុងសន្និសីទកាសែតថា៖ “នេះគឺជាការបង្កហេតុច្បាស់នឹងភ្នែក មិនអាចប្រកែកបាន និងការឈ្លានពានដែនអាកាសរបស់យើងដោយកូរ៉េខាងជើង”។
ក្នុងប្រតិបត្តិការឆ្លើយតបនោះ យន្តហោះវាយប្រហារធុនស្រាល KA-1 មួយគ្រឿងរបស់កូរ៉េខាងត្បូងក៏មានបញ្ហាផងដែរនៅពេលហោះឡើង មូលហេតុនៃយន្តហោះនេះមិនទាន់ដឹងច្បាស់ទេ ហើយក៏មិនមានអ្នករងរបួសដែរ។ យោងតាមប្រភពដដែល យន្តហោះគ្មានមនុស្សបើកកូរ៉េខាងជើងឆ្លងមកលើកនេះ គ្មានអ្វីក្រៅតែពីការឈ្លបយកការណ៍នោះទេ ពួកគេធ្លាប់បានបញ្ជូនយន្តហោះគ្មានមនុស្សបើកម្តងដែរក្នុងឆ្នាំ២០១៧ ក្រោមព្រំដែនអន្តរកូរ៉េដើម្បីមកធ្វើចារកម្មលើប្រព័ន្ធមីស៊ីលដែលផលិតដោយសហរដ្ឋអាម៉េរិក៕
ប្រភព៖ CNN
ប្រភពរូប៖CNN
ប្រែសម្រួល៖សុខ តុលា
