ក្លិប Wolverhampton Wanderers (Wolves) បានព្រមព្រៀងចុះហត្ថលេខាលើការខ្ចីជើងខ្សែប្រយុទ្ធសញ្ជាតិប្រេស៊ីល Matheus Cunha ពីក្លិប Atletico Madrid នៅក្របខ័ណ្ឌ La Liga របស់ប្រទេសអេស្ប៉ាញ។ នេះបើតាមការឱ្យដឹងពីក្លិបបាល់ទាត់ទាំង២ កាលពីថ្ងៃអាទិត្យ ដែលជាថ្ងៃបុណ្យគ្រិស្តស្មាស់តែម្ដង។
Wolves បានឱ្យដឹងថា កីឡាករ Cunha នឹងចូលរួមជាមួយក្លិប ចាប់ពីថ្ងៃទី១ ខែមករា តាមកិច្ចសន្យា ដែលអាចក្លាយទៅជាការផ្ទេរអចិន្ត្រៃយ៍រហូតដល់ឆ្នាំ២០២៧ ប្រសិនបើលក្ខន្តិកមួយចំនួន ត្រូវបានសម្រេចឡើង។
«យើងបានប្រទះឃើញអំណោយមួយទៀតនៅក្រោមដើមឈើ»។ នេះជាសាររបស់ក្លិប នៅក្របខ័ណ្ឌ Premier League អង់គ្លេស ដែលសរសេរលើបណ្ដាញសង្គម Twitter របស់ខ្លួន ដោយប្រកាសបន្ថែមថា កីឡាករវ័យ ២៣ឆ្នាំ គឺជាកីឡាករចំណូលថ្មីដំបូងគេរបស់លោក Julen Lopetegui ក្នុងនាមជាគ្រូបង្វឹករបស់ក្រុម Wolves។
កីឡាករ Cunha បានចូលរួមជាមួយក្រុម Atletico ក្នុងខែសីហា ឆ្នាំ២០២១ ហើយស៊ុតបញ្ចូលទីបាន ៦គ្រាប់ នៅ La Liga ក្នុងចំណោមការបង្ហាញខ្លួន ៤០លើក។ រូបគេភាគច្រើនលេងក្នុងនាមជាកីឡាករបម្រុង។ នៅមុននោះ រូបគេបានលេងនៅក្របខ័ណ្ឌ Bundesliga របស់ប្រទេសអាល្លឺម៉ង់ ដោយចូលរួមជាមួយក្លិប RB Leipzig ពីឆ្នាំ២០១៨ ដល់ឆ្នាំ២០២០ ហើយបន្ទាប់មក ចំណាយពេលមួយរដូវកាល នៅឯក្លិប Hertha Berlin។
កីឡាករ Cunha បានបង្ហាញខ្លួនលើកដំបូងឱ្យក្រុមជម្រើសជាតិធំប្រេស៊ីល កាលពីខែកញ្ញា ឆ្នាំ២០២១ ក្នុងការប្រកួតវគ្គជម្រុះ World Cup ដែលមានជ័យជម្នះលើក្រុមស៊ីលី ១-០។ មួយខែ នៅមុននោះ រូបគេបានឈ្នះមេដាយមាសជាមួយក្រុមជម្រើសជាតិអាយុក្រោម ២៣ឆ្នាំរបស់ប្រទេសប្រេស៊ីល ក្នុងព្រឹត្តិការណ៍អូឡាំពិក នាទីក្រុងតូក្យូ ប្រទេសជប៉ុន៕
