លោក Antonio Conte ដែលជាអ្នកចាត់ការរបស់ក្រុម Tottenham Hotspur (Spurs) ពិតជាមិនសប្បាយចិត្តនោះឡើយ ដែលការប្រកួតប្រជែង នៅក្របខ័ណ្ឌ Premier League នឹងចាប់ផ្ដើមបន្តឡើងវិញត្រឹមរយៈពេលតែ ៨ថ្ងៃ បន្ទាប់ពីចប់ព្រឹត្តិការណ៍ World Cup ហើយបានព្រលយពាក្យថា គាត់អាចនឹងឱ្យកីឡាករខ្លះសម្រាក ពេលធ្វើដំណើរទៅផ្ទះរបស់ក្រុម Brentford សម្រាប់ហ្គេម នៅថ្ងៃ Boxing Day (ការប្រកួតក្រោយថ្ងៃបុណ្យគ្រិស្ដស្មាស់)។
ក្នុងចំណោមកីឡាករទាំង ១២នាក់របស់ក្រុម Spurs ដែលមានវត្តមានក្នុងប្រទេសកាតា លោក Conte បានដកអ្នកចាំទីសញ្ជាតិបារាំង Hugo Lloris និងខ្សែការពារសញ្ជាតិអាហ្សង់ទីន Cristian Romero ដែលបានលេងក្នុងវគ្គផ្តាច់ព្រ័ត្រ នៅ World Cup កាលពីថ្ងៃអាទិត្យកន្លងទៅ ចេញពីការប្រកួត នៅថ្ងៃចន្ទនេះ។
«វាគឺជាស្ថានភាពចម្លែកមួយ ហើយនិយាយដោយស្មោះត្រង់ ក្នុងការប្រកួតដ៏ឆាប់រហ័សបែបនេះ ពោលគឺត្រឹមតែ ១សប្តាហ៍ បន្ទាប់ពីការប្រកួត នៅ World Cup ខ្ញុំពិតជាមិនសប្បាយចិត្តនោះឡើយ»។ នេះជាការលើកឡើងរបស់លោក Conte ដែលត្រូវបានផ្សព្វផ្សាយ នៅក្នុងបណ្ដាញសារព័ត៌មានរបស់ប្រទេសអង់គ្លេស កាលពីថ្ងៃអាទិត្យ។
លោកបានបន្តថា៖ «វាមិនអាចទៅរួចនោះទេ ក្នុងការឱ្យពួកគេសម្រាកឱ្យបានច្រើន ហើយប្រាកដណាស់ជាមួយនឹងកីឡាករ ដែលមិនបានទៅចូលរួម នៅ World Cup ហើយយើងធ្វើការហ្វឹកហាត់ អស់រយៈពេល ៤សប្តាហ៍។ ឥឡូវនេះ ពួកគេស្ថិតក្នុងកម្រិតមួយ ដែលប្រសើរជាងកីឡាករ ដែលបានបញ្ចប់ការប្រកួតប្រជែង នៅ World Cup ទៀត»។
«សម្រាប់ហេតុផលនេះ ខ្ញុំគិតថា ខ្ញុំត្រូវតែធ្វើការសម្រេចចិត្តដ៏ល្អបំផុតមួយ សម្រាប់ការប្រកួតទល់នឹងក្រុម Brentford»។ នេះជាការបន្ថែមរបស់លោក Conte ដោយបានបញ្ជាក់ទៀតថា កីឡាករដែលបានត្រឡប់ពី World Cup វិញ គឺមិនស្ថិតក្នុងទម្រង់លេងកម្រិតកំពូល នៅពេលនេះទេ។
កីឡាករ Rodrigo Bentancur នឹងខកខានការប្រកួត ដោយសារជាប់ការពិន័យ ប៉ុន្តែក៏កំពុងមានបញ្ហាសរសៃពួរដែរ ខណៈដែលខ្សែប្រយុទ្ធ Richarlison នឹងអវត្តមានរយៈពេលពី ៣ ទៅ ៤សប្តាហ៍ដោយសាររបួសសរសៃពួរ ដែលកើតមាន អំឡុងពេលលេងឱ្យក្រុមជម្រើសជាតិប្រេស៊ីល នៅ World Cup។
ក្រុម Spurs នឹងចាប់ផ្ដើមការប្រកួតប្រជែងឡើងវិញ ដោយឈរនៅចំណាត់ថ្នាក់លេខ៤ ក្នុងតារាងពិន្ទុ ជាមួយនឹង ២៩ពិន្ទុ បន្ទាប់ពីបញ្ចប់ទៅ ១៥ហ្គេម ដោយតាម ៨ពិន្ទុពីក្រោយក្រុមកំពូលតារាង Arsenal ដែលប្រកួតតិចជាង ១លើក៕
