មនុស្សយ៉ាងហោចណាស់ ៣២នាក់បានស្លាប់នៅទូទាំងសហរដ្ឋអាម៉េរិកត្រឹមតែក្នុងរយៈពេលចុងសប្តាហ៍ប៉ុណ្ណោះ ដោយសារព្យុះព្រិលរដូវរងាបានវាយប្រហារខ្លាំង សីតុណ្ហភាពចុះត្រជាក់ក្រោមសូន្យអង្សាសេ។
![](https://cambodiaflashnews.com/wp-content/uploads/2021/06/top-banner.gif)
យោងតាមរបាយការណ៍សរុបគិតត្រឹមថ្ងៃចន្ទនេះ អ្នកស្លាប់រួមមានចំនួន ៣២នាក់មកតំបន់ដូចជាទីក្រុងញូយ៉ក រដ្ឋអូហៃអូ រដ្ឋខូឡូរ៉ាដូ រដ្ឋ Missouri, Kansas ក៏ដូចជា Kentucky ដោយភាគច្រើនមកពីគ្រោះថ្នាក់ចរាចរពេលកំពុងធ្វើដំណើរក្នុងស្ថានភាពធ្លាក់ព្រិលមើលគ្នាមិនឃើញ និងខ្លះទៀតដោយសារមិនអាចទ្រាំទ្រនឹងសីតុណ្ហភាពត្រជាក់ខ្លាំងបាន។ នៅក្នុងរដ្ឋខូឡូរ៉ាដូ បុរសអនាថាម្នាក់ត្រូវបានរកឃើញដេកស្លាប់ចំពេលសីតុណ្ហភាពធ្លាក់ចុះក្រោមសូន្យអង្សាសេ ខណៈស្ត្រីម្នាក់ទៀតបានធ្លាក់ចូលក្នុងទឹកកកទន្លេ Wisconsin អំឡុងពេលផុងទឹកកកនៅផ្ទៃខាងលើ ។
ក្រៅតែពីអ្នកស្លាប់ យោងតាមគេហទំព័រតាមដានការហោះហើរ Flightaware.com បានឱ្យដឹងថា ព្យុះព្រិលនេះពិតជាកាចសាហាវបំផុតមួយក្នុងរយៈពេលជាច្រើនទសវត្សរ៍មិនធ្លាប់មាន បានបង្ខំឱ្យលុបចោលជើងហោះហើរអាម៉េរិកជាង ២.៤០០ជើងកាលពីថ្ងៃអាទិត្យ បន្ថែមពីលើការលុបចោលចំនួន ៣.៥០០ កាលពីថ្ងៃសៅរ៍ និងជិត ៦.០០០ជើងថ្ងៃសុក្រ។ អ្នកធ្វើដំណើរនៅតែកំពុងជាប់គាំង ឬត្រូវពន្យារពេលនៅអាកាសយានដ្ឋាន ពេញមួយថ្ងៃបុណ្យណូអែល។ ជាក់ស្តែងអាកាសយានដ្ឋាននៅ Buffalo ក៏ត្រូវបានបិទដែរ ខណៈព្រិលនៅទីនោះបានធ្លាក់ក្នុងកម្រាស់ ១០៩ សង់ទីម៉ែត្រ។ ដោយឡែកនៅទូទាំងព្រំដែនអាម៉េរិកជជាមួយប្រទេសកាណាដា អគ្គិសនីក៏បានកាត់ផ្តាច់អ្នកប្រើប្រាស់យ៉ាងតិចណាស់ ១៤០.០០០នាក់ផងដែរ ដែលភាគច្រើននៅក្នុងទីក្រុង Ontario និង Quebec។ ជាការឆ្លើយតប រដ្ឋបាលរបស់ប្រធានាធិបតី Joe Biden បានយល់ព្រមគាំទ្រសំណើសម្រាប់ការប្រកាសកញ្ចប់សង្រ្គោះសហព័ន្ធ៕
ប្រភព៖ ALJAZEERA
ប្រភពរូប៖ALJAZEERA
ប្រែសម្រួល៖សុខ តុលា