ភ្នំពេញ៖ប្រជាពលរដ្ឋបានប្រទះឃើញបុរសម្នាក់ស្លាប់ដោយមានស្នាមរបួសដាច់ត្រង់កស្ទើរដាច់ក្បាលចេញពីដងខ្លួន ហើយក្បែរសពមានដាវ១ដើម សមត្ថកិច្ចកំពុងស្រាវជ្រាវករណីនេះ។ហេតុការណ៍ខាងលើបានកើតឡើងនៅកន្លែងលាងរថយន្តទុកចោលមួយ ក្នុងភូមិថ្មី សង្កាត់ដង្កោ ខណ្ឌដង្កោ កាលពីព្រឹកថ្ងៃទី២៦ ខែធ្នូ ។
![](https://cambodiaflashnews.com/wp-content/uploads/2021/06/top-banner.gif)
មន្ត្រីមូលដ្ឋានបានឱ្យដឹងថា បុរសដែលស្លាប់មិនទាន់ស្គាល់អត្តសញ្ញាណនៅឡើយ មានសម្បុរសណ្តែកបាយ អាយុប្រហែលជាង៣០ឆ្នាំ ស្លៀកខោខ្លីពណ៌ខ្មៅ និងអាវយឺតដៃខ្លី ពណ៌ខ្មៅ នៅក្បែរសពមានដាវ១ដើម។
មន្ត្រីដដែលបានបន្តថា មិនមាននរណាម្នាក់បានដឹងថាបុរសខាងលើត្រូវឃាតកកាប់សម្លាប់តាំងពីពេលណាមកទេ។ប៉ុន្តែសាកសពនៅមិនទាន់ធុំក្លិនស្អុយនៅឡើយ ហើយឈាមក៏នៅស្រស់ៗនៅឡើយដែរ។ក្រោយមកកម្លាំងនគរបាលបានចុះហ៊ុមព័ទ្ធបរិវេណកើតហេតុរង់ចាំផ្នែកនគរបាលបច្ចេកទេសវិទ្យាសាស្ត្ររាជធានីភ្នំពេញនិងគ្រូពេទ្យតុលាការចុះមកពិនិត្យធ្វើកោសល្យវិច័យ។
សាកសពត្រូវបាននាំយកទៅតម្កល់នៅឈាបនដ្ឋានវត្តឫស្សីសាញ់។ពេលនេះកម្លាំងសមត្ថកិច្ចបើកការស្រាវជ្រាវរកអត្តសញ្ញាណជនរងគ្រោះដើម្បីទាក់ទងក្រុមគ្រួសារមកយកទៅធ្វើបុណ្យនិងបន្តស្វែងរកចាប់ខ្លួនឃាតកយកមកផ្តន្ទាទោសតាមច្បាប់៕ដោយ៖វិចិត្រ