អ្នកចាំទី Andre Onana របស់ក្រុមជម្រើសជាតិកាមេរូន បានប្រកាសចូលនិវត្តន៍ពីបាល់ទាត់អន្តរជាតិហើយ ដោយការប្រកាសនេះ កើតឡើងក្រោយ ១ខែ បន្ទាប់ពីមានបញ្ហាជាមួយគ្រូបង្វឹកជម្រើសជាតិ លោក Rigobert Song ក្នុងព្រឹត្តិការណ៍ World Cup នៅប្រទេសកាតា។
អ្នកចាំទី Onana វ័យ ២៦ឆ្នាំរបស់ក្លិប Inter Milan មិនបានផ្តល់ហេតុផលជាក់លាក់ សម្រាប់ការសម្រេចចិត្របស់ខ្លួននេះទេ ដោយគ្រាន់តែនិយាយថា «រឿងរបស់គេជាមួយក្រុមជម្រើសជាតិកាមេរូន បានដល់ទីបញ្ចប់ហើយ»។
កីឡាករ Onana បានឱ្យដឹងក្នុងសេចក្តីថ្លែងប្រកាសមួយកាលពីថ្ងៃសុក្រថា៖ «កីឡាករមកហើយក៏ទៅ ឈ្មោះក៏បាត់ភ្លាមមួយរំពេច ប៉ុន្តែកាមេរូនមកមុន (សំខាន់ជាង) កីឡាករ ឬបុគ្គលណាៗទាំងអស់។ កាមេរូននៅបន្តជានិច្ចនិរន្តរ៍ ក៏ដូចជាក្តីស្រលាញ់របស់ខ្ញុំ ចំពោះក្រុមជម្រើសជាតិ និងប្រជាជនរបស់យើង ដែលតែងតែគាំទ្រពួកយើងរៀងរហូតមក មិនថា ស្ថិតក្នុងគ្រាលំបាកយ៉ាងណាក្ដី»។
កីឡាករ Onana បានលេងក្នុងការប្រកួតបើកឆាក ដែលក្រុមរបស់គេ ចាញ់ក្រុមស្វីស ១-០ នៅប្រទេសកាតានោះ ប៉ុន្តែត្រូវបានទម្លាក់ឈ្មោះចេញ សម្រាប់ការប្រកួត ២លើកបន្ទាប់ បន្ទាប់ពីមានសេចក្តីរាយការណ៍ថា មានគំនិតខ្វែងគ្នាជាមួយលោក Song ពាក់ព័ន្ធនឹងតាកទិច (យុទ្ធសាស្ត្រ) របស់ក្រុម។
សហព័ន្ធបាល់ទាត់របស់ប្រទេស (FECAFOOT) បានឱ្យដឹងថា នាពេលនោះ អ្នកចាំទីរូបនេះត្រូវបានព្យួរ សម្រាប់ «ហេតុផលវិន័យ»។ កីឡាករ Onana បានចូលលេងការប្រកួត ៣៤លើកឱ្យក្រុមកាមេរូន បន្ទាប់ពីការបង្ហាញខ្លួនលើកដំបូងរបស់ខ្លួន ក្នុងឆ្នាំ២០១៦៕
