ប្រធានាធិបតីរុស្ស៊ី វ្ល៉ា ឌឹមៀរពូទីន បាននិយាយថា ចង់ទាហានរុស្ស៊ីត្រូវការអ្វីក៏ដោយពេលនេះ រដ្ឋាភិបាលអាចផ្តល់ឲ្យបានគ្រប់យ៉ាងទាំងអស់។
![](https://cambodiaflashnews.com/wp-content/uploads/2021/06/top-banner.gif)
នៅក្នុងសុន្ទរកថាអំឡុងពេលកិច្ចប្រជុំតាមទូរទស្សន៍ជាមួយមន្ត្រីយោធាជាន់ខ្ពស់នៅទីក្រុងមូស្គូកាលពីថ្ងៃពុធសប្តាហ៍នេះ លោក ពូទីន ពិតជាបានលើកឡើងដូច្នេះមែន តែបានភ្ជាប់ជាមួយពាក្យជាច្រើនទៀត ដោយសំដៅផ្តល់ឱវាទ ក៏ដូចជាការលើកទឹកចិត្តដល់កងកម្លាំងរុស្ស៊ីដែលកំពុងប្រយុទ្ធលើទឹកដីអ៊ុយក្រែនអស់រយៈពេល១០ខែមកនេះ។ ពូទីន បានប្រាប់ឲ្យទាហានរុស្ស៊ីទាំងអស់ត្រូវចេះតស៊ូ អត់ទ្រាំ រៀនដោះស្រាយបញ្ហារបស់ខ្លួនក្នុងសមរភូមិនៅអ៊ុយក្រែន ខណៈរដ្ឋាភិបាលអាចផ្តល់ឲ្យបាននូវអ្វីដែលទាហានត្រូវការ ដូចជា ថវិកា ឬឧបករណ៍ប្រយុទ្ធ។ សម្រង់សម្ដី “យើងមិនមានការរឹតបន្តឹងផ្នែកថវិកាទេ។ ប្រទេសនិងរដ្ឋាភិបាលកំពុងផ្តល់អ្វីគ្រប់យ៉ាងដែលកងទ័ពទាមទារ”។ “ភារកិច្ចដ៏សំខាន់បំផុតនៃឧស្សាហកម្មយោធា-ឧស្សាហកម្មរបស់យើងគឺផ្តល់អង្គភាព និងកងកម្លាំងជួរមុខរបស់យើងនូវអ្វីគ្រប់យ៉ាងដែលពួកគេត្រូវការ៖ សព្វាវុធ បរិក្ខារ គ្រាប់រំសេវ និងឧបករណ៍ក្នុងបរិមាណចាំបាច់ និងមានគុណភាពត្រឹមត្រូវក្នុង រយៈពេលដ៏ខ្លីបំផុត”។
ពូទីនថែមទាំងបានគូសបញ្ជាក់អំពីឧបសគ្គខ្លះៗក្នុងដំណើរការចល័តទ័ព៣០ម៉ឺននាក់នាពេលកន្លងទៅ ទទួលយកការរិះគន់ក្នុងន័យស្ថាបនាផងដែរ។ លោកបានមានប្រសាសន៍ថា “ខ្ញុំបានស្នើឱ្យក្រសួងការពារជាតិយកចិត្តទុកដាក់ចំពោះគំនិតផ្តួចផ្តើមរបស់ជនស៊ីវិលទាំងអស់ រួមទាំងការគិតគូរដល់ការរិះគន់ និងឆ្លើយតបឱ្យបានត្រឹមត្រូវ ទាន់ពេលវេលា”។ ការទទួលស្គាល់នេះ កើតឡើងក្នុងពេលដែលរដ្ឋមន្រ្តីការពារជាតិរុស្ស៊ីបានស្នើឲ្យមានការកេណ្ឌទ័ពបន្ថែម ១,៥លាននាក់ ស្នើបង្កើនអាយុអ្នកចូលធ្វើទាហានពី ២១ឆ្នាំទៅ៣០ឆ្នាំ ធៀបនឹងពេលមុនគឺ ១៨ឆ្នាំទៅ២៧ឆ្នាំ៕
ប្រភព៖ ALJAZEERA
ប្រភពរូប៖ALJAZEERA
ប្រែសម្រួល៖សុខ តុលា