រដ្ឋមន្ត្រីកីឡារបស់ប្រទេសបារាំង លោកស្រី Amelie Oudea-Castera បាននិយាយថា លោកស្រីអាចទាក់ទងទៅសមភាគីអាហ្សង់ទីនរបស់លោកស្រី ជុំវិញការប្រើប្រាស់ពាក្យប្រមាថលើខ្សែប្រយុទ្ធ Kylian Mbappe របស់ក្រុមជម្រើសជាតិ ពីសំណាក់អ្នកគាំទ្រអាហ្សង់ទីនមួយចំនួន នៅទីក្រុង Buenos Aires ក្នុងខណៈពេលដែលពួកគេ ធ្វើពិធីអបអរនៃការវិលត្រឡប់មកវិញរបស់ក្រុមជើងឯក World Cup។
អំឡុងការស្វាគមន៍នៃការត្រឡប់មកផ្ទះវិញដ៏រីករាយរបស់អាហ្សង់ទីននោះ អ្នកគាំទ្រមួយក្រុម បានដុតគម្របមឈូសដែលធ្វើដោយខ្លួនឯង តុបតែងដោយឈើឆ្កាង និងរូបភាពរបស់កីឡាករ Mbappe ខណៈពេលដែលអ្នកចាំទី Emiliano Martinez របស់ក្រុមអាហ្សង់ទីន បានឱបរូបទារកប្រដាប់ក្មេងលេង ដែលមានមុខរបស់កីឡាករ Mbappe ក្នុងខណៈពេលដែលក្បួនដង្ហែរថយន្តក្រុងបើកដំបូល ធ្វើដំណើរយឺតៗឆ្លងកាត់រដ្ឋធានី។
រូបភាពទាំង២ នោះ បានល្បីពេញបណ្ដាញសង្គម ហើយពាក់ព័ន្ធករណីនេះ លោកស្រី Oudea-Castera បានប្រាប់វិទ្យុ RTL ថា លោកស្រីកំពុងពិនិត្យមើលយ៉ាងយកចិត្តទុកដាក់។
លោកស្រីបានថ្លែងថា៖ «ខ្ញុំមិនបានច្រានចោលការពិភាក្សារឿងនេះជាមួយសមភាគីរបស់ខ្ញុំនោះទេ»។ លោកស្រីបានបញ្ជាក់ថែមថា ស្ថាប័នបាល់ទាត់របស់ប្រទេសបារាំង ក៏បានសរសេរសំបុត្រទៅកាន់លោក Claudio Tapia ប្រធានសហព័ន្ធបាល់ទាត់អាហ្សង់ទីន (AFA) អំពីរឿងនេះផងដែរ ដោយលោកស្រីបានលើកឡើងបន្ថែមថា៖ «ខ្ញុំយល់ឃើញថា រឿងនេះ គឺគួរឱ្យអាណិតអាសូរណាស់»។
ស្ថានទូតអាហ្សង់ទីន នៅទីក្រុងប៉ារីស មិនបានឆ្លើយតបភ្លាមៗនោះទេ ចំពោះការស្នើសុំការអត្ថាធិប្បាយលើបញ្ហានេះ៕
