ខ្សែប្រយុទ្ធ Marcus Rashford បានវិលពីការបំពេញកាតព្វកិច្ចជាមួយក្រុមជម្រើសជាតិ ក្នុងព្រឹត្តិការណ៍ World Cup វិញ ជាមួយនឹងគ្រាប់បាល់ដ៏អស្ចារ្យ ដោយការបណ្ដើរតែម្នាក់ឯងទៅស៊ុតបញ្ចូលទី ខណៈដែលក្រុមបិសាចកក្រហម Manchester United ធ្វើដំណើរទៅវគ្គ ៨ក្រុមចុងក្រោយនៃកម្មវិធី League Cup កាលពីថ្ងៃពុធ ជាមួយនឹងជ័យជម្នះ ២-០ លើក្រុម Burnley ស្របពេលដែលក្រុមក្នុងក្របខ័ណ្ឌ Premier League ជាមួយគ្នា គឺ Brighton ត្រូវបានទម្លាក់ដោយក្រុម Charlton ដែលលេងនៅលីគកម្រិតទី ៣។
![](https://cambodiaflashnews.com/wp-content/uploads/2021/06/top-banner.gif)
ហ្គេមដំបូងរបស់ក្រុម Man Utd ចាប់តាំងពី World Cup និងជាលើកទី១ របស់ពួកគេ ចាប់តាំងពីការចាកចេញរបស់ខ្សែប្រយុទ្ធ Cristiano Ronaldo ពីទឹកដី Old Trafford បានឃើញថា ពួកគេបាននាំមុខ នៅនាទីទី២៧ តាមរយៈការស៊ុតរបស់ខ្សែបម្រើសញ្ជាតិដាណឺម៉ាក Christian Eriksen ដែលបានបង្ហាញខ្លួនផងដែរ ក្នុងព្រឹត្តិការណ៍ នៅប្រទេសកាតា នាឆ្នាំ២០២២ នេះ។
កីឡាករ Rashford ដែលរកបាន ៣គ្រាប់ឱ្យក្រុមតោកំណាចអង់គ្លេស នៅ World Cup បានបន្ថែមការនាំមុខឱ្យក្រុម Man Utd នៅនាទីទី៥៧ សម្រាប់ការប្រកួតទល់នឹងក្រុម Burnley ដែលដឹកនាំដោយលោក Vincent Kompany ជាមួយនឹងបច្ចេកទេសយ៉ាងល្អអស្ចារ្យ ដោយខ្សែប្រយុទ្ធជម្រើសជាតិអង់គ្លេសរូបនេះ បានរត់បណ្ដើរបាល់តាំងពីពាក់កណ្ដាលតារាង ហើយចូលទៅក្នុងប្រអប់គ្រោះថ្នាក់របស់ក្រុមគូបដិបក្ខ មុនពេលស៊ុតទម្លុះសំណាញ់ទី។
ចំណែកក្រុម Brighton បានខ្ទាតចេញពីការប្រកួតប្រជែងនៃកម្មវិធីនេះ ដោយការចាញ់ ក្នុងវគ្គស៊ុតប៉េណាល់ទីកាត់ក្ដី ពោលគឺកើតឡើង ក្នុងរយៈពេលតែ ៣ថ្ងៃបន្ទាប់ពីកីឡាកររបស់ក្លិប គឺ Alexis Mac Allister បានឈ្នះពានរង្វាន់ World Cup ជាមួយក្រុមអាហ្សង់ទីន។
លទ្ធផលស្មើដោយគ្មានគ្រាប់បាល់ ក្នុងម៉ោងធម្មតា បានធ្វើឱ្យការប្រកួតឈានដល់ការស៊ុតបាល់ ប៉េណាល់ទី ដើម្បីរកក្រុមឈ្នះ ហើយចុងក្រោយ ក្រុម Charlton បានកក់កៅអីរបស់ពួកគេក្នុងវគ្គ ១/៤ ផ្តាច់ព្រ័ត្រជាមួយនឹងជ័យជម្នះ ៤-៣ ក្នុងវគ្គទាត់កាត់ក្ដីនេះ៕