ស៊ុបភើស្តារ Lionel Messi នឹងអបអរជ័យជម្នះពីព្រឹត្តិការណ៍ World Cup របស់ខ្លួន ដោយការយល់ព្រមស្នាក់នៅបន្តជាមួយក្លិប Paris Saint-Germain (PSG) ខណៈដែលរូបគេព្យាយាមជួយនាំក្រុមយក្សរបស់បារាំងមួយនេះឱ្យឈ្នះជើងឯក នៅក្របខ័ណ្ឌ Champions League ដែលតែងតែរបូតពីដៃពួកគេពី ១រដូវកាល ទៅ ១រដូវកាល។ នេះបើយោងបណ្ដាញសារព័ត៌មានក្នុងស្រុក កាលពីថ្ងៃពុធ។
![](https://cambodiaflashnews.com/wp-content/uploads/2021/06/top-banner.gif)
កីឡាករវ័យ ៣៥ឆ្នាំ ដែលជួយនាំឱ្យក្រុមជម្រើសជាតិអាហ្សង់ទីនទទួលបានជ័យជម្នះ ក្នុងការប្រកួតវគ្គផ្តាច់ព្រ័ត្រ នៅឯព្រឹត្តិការណ៍ World Cup ទល់នឹងក្រុមបារាំង ក្នុងប្រទេសកាតា កាលពីចុងសប្តាហ៍កន្លងទៅ នឹងបន្តកិច្ចសន្យារយៈពេល ១រដូវកាលទៀតជាមួយក្លិបយក្ស នៅរដ្ឋធានីនៃប្រទេសបារាំង ខណៈដែលកុងត្រាបច្ចុប្បន្នរបស់គេ នឹងផុតកំណត់ នៅរដូវក្តៅខាងមុខនេះ។
បណ្ដាញសារព័ត៌មាន Le Parisian និង RMC Sport បានរាយការណ៍ថា កីឡាករ Messi នឹងអង្គុយចុះជាមួយប្រធានក្លិប PSG លោក Nasser Al-Khelaifi និងមន្ត្រីកំពូលៗរបស់ក្លិបផ្សេងទៀត នៅពេលដែលរូបគេវិលត្រឡប់មកវិញ បន្ទាប់ពីបញ្ចប់ការអបអរពាន World Cup នៅឯប្រទេសកំណើត។
កីឡាករ Messi បានចូលរួមជាមួយក្រុម PSG ក្នុងឆ្នាំ២០២១ ដោយមានកិច្ចសន្យារយៈពេល ២រដូវកាលជាមួយនឹងជម្រើសបន្ត ១ឆ្នាំទៀត បន្ទាប់ពីបានចំណាយពេលពេញមួយអាជីពរបស់ខ្លួនជាមួយក្លិបយក្ស Barcelona។ នៅឯប្រទេសអេស្ប៉ាញនោះ ម្ចាស់ពានរង្វាន់ Ballon d’Or ៧សម័យកាលរូបនេះ បានឈ្នះជើងឯក នៅក្របខ័ណ្ឌ Champions League ៤ដង (ឆ្នាំ២០០៦, ២០០៩, ២០១១ និង ២០១៥) ព្រមទាំងពាន ក្នុងក្របខ័ណ្ឌ La Liga ចំនួន ១០ដង។
កាលពីថ្ងៃអាទិត្យ រូបបានជួយជំរុញឱ្យក្រុមអាហ្សង់ទីនឈ្នះការស៊ុតបាល់ប៉េណាល់ទីកាត់ក្ដីលើក្រុមបារាំង ក្នុងវគ្គផ្តាច់ព្រ័ត្រ នៅ World Cup បន្ទាប់ពីការប្រកួតក្នុងរយៈពេលដ៏យូរ រហូតដល់ទៅ ១២០នាទី បានបញ្ចប់ទៅក្នុងលទ្ធផលស្មើគ្នា ៣-៣។
កីឡាករ Messi ដែលជាប់ឈ្មោះជាកីឡាករល្អបំផុតប្រចាំការប្រកួតនោះ ស៊ុតបញ្ចូលទីបាន ២គ្រាប់ ខណៈដែលមិត្តរួមក្រុម PSG គឺខ្សែប្រយុទ្ធ Kylian Mbappe ធ្វើបានហ៊ែតទ្រិក (ស៊ុត ៣គ្រាប់) ឱ្យក្រុមបារាំង៕