រដ្ឋមន្រ្តីការពារជាតិរុស្ស៊ី លោក Sergei Shoigu បានផ្តល់ការវាយតម្លៃថា រុស្ស៊ីត្រូវតែបង្កើនចំនួនទ័ពរបស់ខ្លួនឲ្យឡើងដល់ជាង១លាននាក់ទើបបាន ខណៈសង្រ្គាមកំពុងអូសបន្លាយឈានដល់ឆ្នាំ២០២៣។
![](https://cambodiaflashnews.com/wp-content/uploads/2021/06/top-banner.gif)
រដ្ឋមន្ត្រីការពារជាតិរុស្ស៊ី លោក Sergei Shoigu កាលពីថ្ងៃពុធ បានប្រកាសក្នុងជំនួបរវាងប្រធានាធិបតីរុស្ស៊ីលោក Vladimir Putin និងមេដឹកនាំយោធាកំពូលរបស់ប្រទេសថា ប្រទេសនេះគ្រោងនឹងបង្កើនកម្លាំងទាហានរបស់ខ្លួនឲ្យឡើងដល់ ១,៥ លាននាក់ ដើម្បីឆ្លើយតបនឹងស្ថានភាពសង្រ្គាមនាពេលបច្ចុប្បន្ន ដែលនឹងអូសបន្លាយយូរទៅមុខទៀតក្នុងឆ្នាំ២០២៣។ Shoigu មិនបានបង្ហាញពីពេលវេលាច្បាស់លាស់នៃការបង្កើនការគ្រោងទុកនេះទេ តែបាននិយាយថា ទាហាន ១,៥ លាននាក់គួរតែរួមបញ្ចូលជាមួយទាហានស្ម័គ្រចិត្តប្រមាណ ៦៩៥.០០០នាក់ផងដែរ។
ផែនការកេណ្ឌទ័ពនេះ បានកើតឡើងបន្ទាប់ពីរុស្ស៊ីបានប្រឈមមុខនឹងការខាតបង់នៅលើសមរភូមិក្នុងប្រទេសអ៊ុយក្រែននារយៈពេលប៉ុន្មានខែថ្មីៗនេះ ដែលត្រូវបានរាយការណ៍ដោយសារព័ត៌មានឯករាជ្យ និងចំពេលដែលមន្ត្រីអ៊ុយក្រែនបានព្រមានថារុស្ស៊ីកំពុងត្រៀមខ្លួនសម្រាប់ការវាយលុករដូវរងាជាថ្មីនៅប៉ុន្មានខែដំបូងនៃឆ្នាំ ២០២៣។
ផែនការកេណ្ឌទ័ព ឬចល័តចុងក្រោយប្រមាណ ៣០០.០០០ នាក់ បានបង្កឱ្យមានការតវ៉ាទ្រង់ទ្រាយធំនៅទូទាំងប្រទេសរុស្ស៊ីក្នុងខែកញ្ញា នាំឲ្យមានជនចំណាកស្រុករត់គេចខ្លួនទៅកាន់ប្រទេសជិតខាង៕
ប្រភព៖ The HILL
ប្រភពរូប៖The HILL
ប្រែសម្រួល៖សុខ តុលា