មេដឹកនាំរុស្ស៊ី វ្ល៉ា ឌឹមៀរពូទីន បាននិយាយថា លោកនៅតែចាត់ទុកអ៊ុយក្រែនជារដ្ឋបងប្អូនជានិច្ច ទោះមានជម្លោះសព្វថ្ងៃដោយសារតែការបង្កហេតុពីលោកខាងលិចក៏ដោយ។
យោងតាមសុន្ទរកថាតាមទូរទស្សន៍ជាមួយមន្ត្រីយោធាជាន់ខ្ពស់ប្រធានាធិបតីរុស្ស៊ីលោកវ្ល៉ា ឌឹមៀរពូទីន បាននិយាយយ៉ាងដូច្នេះពិតប្រាកដមែនកាលពីថ្ងៃពុធ ទី២១ ខែធ្នូ។ លោកពូទីនបានថ្លែងយ៉ាងក្តែងៗថា គ្មានអ្វីត្រូវមកស្តីបន្ទោសរុស្ស៊ីក្នុងសង្រ្គាមនោះទេ ទាំងអ៊ុយក្រែន និងរុស្ស៊ីសុទ្ធតែខូចខាតតែទាំងពីរ អ្នកដែលត្រូវបន្ទោសគឺលោកខាងលិច ដែលបានប្រើវិធីសាស្រ្តលាងខួរក្បាលអតីតរដ្ឋសហភាពសូវៀត។ សម្រង់សម្ដីលោកថាមើលឃើញអ៊ុយក្រែនជា “ប្រជាជាតិបងប្អូនមិនប្រែប្រួល”។ “គ្មានអ្វីដែលត្រូវចោទប្រកាន់យើងទេ។ យើងតែងតែឃើញប្រជាជនអ៊ុយក្រែនជាបងប្អូននឹងយើង ហើយខ្ញុំនៅតែគិតដូច្នេះ”។ “អ្វីដែលកំពុងកើតឡើងនៅពេលនេះ គឺជាសោកនាដកម្ម ប៉ុន្តែវាមិនមែនជាកំហុសរបស់យើងទេ”។
ពូទីនបានបន្ថែមថា រុស្ស៊ីខំណាស់ក្នុងការពង្រឹងទំនាក់ទំនងជាមួយអ៊ុយក្រែនអស់រយៈពេលជាច្រើនឆ្នាំ ខំឲ្យអ៊ុយក្រែនខ្ចីទាំងលុយ និងជាវប្រភពថាមពលក្នុងតម្លៃទាប តែវាមិនដំណើរការទេ ដោយសារតែមនោគមន៍លោកខាងលិច។
គួរជម្រាបថា ភាពតានតឹងរវាងវិមានក្រឹមឡាំងនិងលោកខាងលិចបានកើនឡើងបន្ទាប់ពីការផ្តួលរំលំប្រធានាធិបតីអ៊ុយក្រែនដែលគាំទ្រដោយវិមានក្រឹមឡាំងលោក Viktor Yanukovych នៅក្នុងឆ្នាំ ២០១៤ បន្ទាប់ពីមានការតវ៉ាជាច្រើនខែនាពេលនោះ៕
ប្រភព៖ BBC NEWS
ប្រភពរូប៖BBC NEWS
ប្រែសម្រួល៖សុខ តុលា
