អ្នកប្រដាល់ Tyson Fury និង Oleksandr Usyk បានព្រមព្រៀងឡើងសង្វៀនតទល់គ្នា ក្នុងការប្រកួតមួយ ដែលអាចនឹងឱ្យម្នាក់ក្លាយជាម្ចាស់ខ្សែក្រវាត់ពិភពលោកប្រភេទទម្ងន់ធ្ងន់ទាំងអស់។ នេះបើយោងតាមអ្នកផ្គូផ្គងជើងចាស់ លោក Bob Arum។
![](https://cambodiaflashnews.com/wp-content/uploads/2021/06/top-banner.gif)
កីឡាករ Fury បានផ្តួលគូប្រកួតរួមសញ្ជាតិអង់គ្លេស Derek Chisora ជាលើកទី៣ ក្នុងអាជីពរបស់ខ្លួន ដើម្បីរក្សាខ្សែក្រវាត់របស់ស្ថាប័ន WBC នៅដើមខែនេះ។ បន្ទាប់មក រូបគេបានស្រែកហៅវីរបុរសអ៊ុយក្រែន Usyk ដែលជាម្ចាស់ខ្សែក្រវាត់របស់ស្ថាប័ន IBF, IBO, WBO និង WBA ដែលកំពុងនៅក្បែរៗសង្វៀន ក្នុងកីឡដ្ឋាន Tottenham Hotspur។
បន្ទាប់ពីការប្រយុទ្ធនោះ Fury អាយុ ៣៤ឆ្នាំ បានព្យាករពីការមានការប៉ះគ្នាជាមួយ Usyk មិនថា នៅប្រទេសអារ៉ាប៊ីសាអ៊ូឌីត ឬក៏ចក្រភពអង់គ្លេស ជួនកាលក្នុងខែកុម្ភៈ ឬខែមីនា។
អ្នកផ្គូផ្គងលោក Arum វ័យ ៩១ឆ្នាំ បានប្រាប់ទូរទស្សន៍ Sky Sports កាលពីថ្ងៃអង្គារថា៖ «អ្នកប្រដាល់ទាំង២ បានព្រមព្រៀងគ្នាហើយ សម្រាប់ការប្រកួតបន្ទាប់។ ជាមួយនឹង Fury និង Usyk ពួកយើងកំពុងមានការព្រមព្រៀងបែបមនុស្សពេញវ័យ ២នាក់ ដែលមិនមានការជជែកដេញដោលគ្នាច្រើនឡើយ។ Usyk គឺជាមិត្តដ៏ល្អរបស់ខ្ញុំ គាត់ឆ្លាតណាស់ ហើយ Tyson គឺជាកំពូលមនុស្ស ទាំងរាងកាយ និងសតិបញ្ញា»។
«ដូច្នេះ ពួកគេចង់បានការប្រកួតនេះ។ ពួកគេទាំង ២នាក់ចង់ប្រយុទ្ធគ្នា ហេតុដូច្នេះ វានឹងមានតិចតួចណាស់ ប្រសិនបើមាន (ភាពរញ៉េរញ៉ៃ)។ ឥឡូវនេះសំណួរ គឺថា តើថ្ងៃណា និងកន្លែងណា។ ប៉ុន្តែការប្រកួតនោះ ពិតជានឹងកើតឡើង ហើយវានឹងកើតឡើងក្នុងរយៈពេល ៤ខែដំបូងនៃឆ្នាំក្រោយ»។ បុរសសញ្ជាតិអាមេរិក ដែលចូលរួមក្នុងការប្រកួតល្បីៗមួយចំនួនរបស់លោក Muhammad Ali ក្នុងទសវត្សរ៍ឆ្នាំ១៩៧០ បានបន្ថែម៕