ប្រធានាធិបតីអ៊ុយក្រែន លោកហ្សេឡិនស្គី ត្រូវបានគេរាយការណ៍ថានឹងធ្វើដំណើរ ទៅកាន់សហរដ្ឋអាម៉េរិកនៅពុធទី ២១ ខែធ្នូនេះ ខណៈនឹងក្លាយជាដំណើរក្រៅប្រទេសដំបូងបង្អស់ចាប់តាំងសង្រ្គាមបានចាប់ផ្តើម។
![](https://cambodiaflashnews.com/wp-content/uploads/2021/06/top-banner.gif)
យោងតាមការចុះផ្សាយដោយសារព័ត៌មាន CNN ដំណើរទស្សនកិច្ចនេះត្រូវបានបញ្ជាក់ដោយមន្ត្រីមិនបញ្ចេញឈ្មោះខាងអាម៉េរិក ក្នុងលក្ខណៈមិនផ្លូវការ។ ដំណើរទស្សនកិច្ចមួយនេះនឹងពោរពេញទៅដោយការព្រួយបារម្ភផ្នែកសន្តិសុខរបស់លោកហ្សេឡិនស្គី – មានន័យថា អាចផ្លាស់ប្តូរនៅពេលជូនដំណឹងខ្លីណាមួយមិនទៀងនោះទេ។ តែការជូនដំណឹងបឋម វានឹងធ្វើឡើងនៅថ្ងៃពុធ ទី២១ ខែធ្នូ ឆ្នាំ២០២២នេះ ខណៈលោកស្គីអាចនឹងជួបជាមួយប្រធានាធិបតីចូបៃដិន ក៏ដូចជាសភាអាម៉េរិក ដើម្បីសំដែងការដឹងគុណ និងរាយការណ៍ពីស្ថានភាពប្រទេស និងអំពាវនាវសុំជំនួយបន្ថែម។
ប្រសិនបើដំណើរទស្សនកិច្ចនេះអាចប្រព្រឹត្តទៅដូចការជូនដំណឹងមែននោះ វានឹងក្លាយជាដំណើរដំបូងបង្អស់ហើយរបស់លោកស្គីទៅកាន់ក្រៅប្រទេស ចាប់តាំងពីសង្រ្គាមបានចាប់ផ្តើមនៅថ្ងៃទី ២៤ ខែកុម្ភៈ ឆ្នាំ២០២២ ខណៈសហរដ្ឋអាម៉េរិកបានប្រកាសកញ្ចប់ជំនួយយោធាធំថ្មីតម្លៃរហូតដល់១,៨ពាន់លានដុល្លារជាការស្វាគមន៍ទៀតផង៕
ប្រភព៖ CNN
ប្រភពរូប៖CNN
ប្រែសម្រួល៖សុខ តុលា