ងាកមកឯរដ្ឋបាលតាលីបង់អាហ្វហ្គានីស្ថានវិញ នៅថ្ងៃអង្គារសប្តាហ៍នេះបានប្រកាសបិទវិស័យអប់រំលើស្រ្តីអាហ្វហ្គានីស្ថានទាំងអស់ទូទាំងប្រទេសមិនឲ្យចូលសិក្សាថ្នាក់ឧត្តមសិក្សាសកលវិទ្យាល័យ។
![](https://cambodiaflashnews.com/wp-content/uploads/2021/06/top-banner.gif)
អ្នកនាំពាក្យក្រសួងឧត្តមសិក្សាអាហ្វហ្គានីស្ថាន បានបញ្ជាក់ពីការផ្អាកនេះពិតប្រាកដមែនទៅកាន់បណ្តាញទូរទស្សន៍ CNN កាលពីថ្ងៃអង្គារទី ២០ ខែធ្នូ ឆ្នាំ២០២២។ លិខិតដែលចេញផ្សាយដោយក្រសួងអប់រំបាននិយាយថា ការសម្រេចនេះត្រូវបានធ្វើឡើងក្នុងកិច្ចប្រជុំគណៈរដ្ឋមន្ត្រីនៃរដ្ឋបាលតាលីបង់ទាំងមូល ហើយបទបញ្ជានឹងចូលជាធរមានភ្លាមៗ។ ប្រភព CNN មិនបានលម្អិតអំពីមូលហេតុដែលឈានដល់ការសម្រេចបិទមិនឲ្យស្រ្តីអាហ្វហ្គានីស្ថានអាចចូលមហាវិទ្យាល័យនោះទេ។ សេចក្តីប្រកាសនេះ បានធ្វើឲ្យសហគមន៍អន្តរជាតិ អ្នកឃ្លាំមើលសិទ្ធិមនុស្ស ក៏ដូចជាសហរដ្ឋអាម៉េរិកហាក់ភ្ញាក់ផ្អើលយ៉ាងខ្លាំង និងបានចេញការថ្កោលទោសដាក់រដ្ឋបាលតាលីបង់យ៉ាងខ្លាំង។
អង្គការឃ្លាំមើលសិទិ្ធមនុស្សបានរិះគន់ការហាមប្រាមកាលពីថ្ងៃអង្គារ ដោយហៅនេះថាជា “ការសម្រេចចិត្តដ៏អាម៉ាស់ដែលរំលោភសិទ្ធិទទួលបានការអប់រំសម្រាប់ស្ត្រី និងក្មេងស្រីនៅក្នុងប្រទេសអាហ្វហ្គានីស្ថាន”។ ដោយឡែក អ្នកនាំពាក្យក្រសួងការបរទេសសហរដ្ឋអាម៉េរិក លោក Ned Price បាននិយាយនៅក្នុងសន្និសីទសារព័ត៌មានកាលពីថ្ងៃអង្គារដែរថា សហរដ្ឋអាម៉េរិកថ្កោលទោស “ការសម្រេចចិត្តដែលមិនអាចប្រកែកបានរបស់ពួកតាលីបង់ក្នុងការហាមឃាត់ស្ត្រីពីសាកលវិទ្យាល័យ”។ “តាលីបង់នឹងទទួលបានផលវិបាកយ៉ាងខ្លាំង ពួកគេនឹងត្រូវផ្តាច់ខ្លួនពីសហគមន៍អន្តរជាតិ បដិសេធពួកគេនូវភាពស្របច្បាប់ដែលពួកគេចង់បាន”។
ចាប់តាំងពីដណ្តើមអំណាចនៅអាហ្វហ្គានីស្ថានកាលពីឆ្នាំមុន ក្រុមតាលីបង់បានព្យាយាមបង្ហាញរូបភាពក្នុងកម្រិតមធ្យមដើម្បីទទួលបានការគាំទ្រពីអន្តរជាតិ និងបានសន្យាជាច្រើនចំពោះសហគមន៍អន្តរជាតិថាខ្លួននឹងការពារសិទ្ធិស្ត្រី និងកុមារីទាំងអស់ តែពួកតាលីបង់បាននិងកំពុងធ្វើផ្ទុយពីនេះ ដោយមានការគៀបសង្កត់ជាប្រព័ន្ធលើសិទ្ធិ និងសេរីភាពរបស់ពួកគេ៕
ប្រភព៖ CNN
ប្រភពរូប៖CNN
ប្រែសម្រួល៖សុខ តុលា