ក្រុមបាល់ទាត់ជម្រើសជាតិបារាំង បានត្រឡប់ពីប្រទេសកាតាទៅប្រទេសរបស់ខ្លួនវិញហើយ ដោយទទួលបានការសាទរពីក្រុមមនុស្សយ៉ាងច្រើន ដែលមកកកកុញ ក្នុងទីក្រុងប៉ារីស កាលពីថ្ងៃចន្ទ បន្ទាប់ពីការរងបរាជ័យដោយភាពអង់អាចរបស់ពួកគេ ក្រោមស្នាដៃរបស់ក្រុមអាហ្សង់ទីន ក្នុងការប្រកួតវគ្គផ្តាច់ព្រ័ត្រនៃព្រឹត្តិការណ៍ World Cup ដែលនាំឱ្យពួកគេទទួលបានកោតសរសើរ ទាំងនៅក្នុងប្រទេស និងជុំវិញពិភពលោក។
គ្រូបង្វឹក ដែលដឹកនាំក្រុមកីឡាករល្បីៗ និងឆ្នើមៗ ដូចជាខ្សែប្រយុទ្ធ Kylian Mbappe ដែលគ្រាប់បាល់ហ៊ែតទ្រិក (៣គ្រាប់) ដ៏គួរឱ្យរំភើបរបស់គេ ក្នុងវគ្គផ្តាច់ព្រ័ត្រ កាលពីថ្ងៃអាទិត្យ បានជួយទាញក្រុមបារាំងឱ្យចេញពីគែមនៃបរាជ័យនោះ បានធ្វើដំណើរពីអាកាសយានដ្ឋាននៃក្រុងប៉ារីស ដែលនៅទីនោះ បុគ្គលិកបានទះដៃអបអរ ពេលពួកគេចុះពីយន្តហោះ ហើយបានឆ្ពោះទៅកាន់ចំណុចកណ្ដាលនៃរដ្ឋធានី ជាកន្លែង ដែលមនុស្សរាប់ពាន់នាក់ បានមកប្រមូលផ្តុំគ្នា ដើម្បីរង់ចាំស្វាគមន៍ពួកគេ។
ទោះបីវាជាពេលល្ងាចដ៏ស្រអាប់ និងត្រជាក់នៃខែធ្នូក៏ដោយ ក៏មនុស្សរាប់ពាន់នាក់ បានមកជួបជុំគ្នា នៅឯទីលាន Place de la Concorde ក្នុងទីក្រុងប៉ារីស។ អ្នកគាំទ្របានដុតកាំជ្រួច គ្រវីទង់ជាតិបារាំង និងស្រែកច្រៀងពាក្យ «Allez Les Bleus» (ឆ្ពោះទៅមុខក្រុមពណ៌ខៀវ) និងភ្លេងជាតិបារាំង ខណៈក្រុមបានបង្ហាញខ្លួននៅលើយ៉នៃសណ្ឋាគារ Hotel de Crillon ដ៏មានកិត្យានុភាព។
គ្រូបង្វឹកលោក Didier Deschamps និងប្រធានក្រុម Hugo Lloris បានលើកដៃគ្រវីស្វាគមន៍ទៅកាន់ក្រុមអ្នកគាំទ្រពីយ៉នោះ។ ក្រោយមក អ្នកទាំង២ ក៏ត្រូវបានចូលរួមដោយកីឡាករផ្សេងទៀត និងកីឡាករ Mbappe ដែលទទួលបានសំឡេងហ៊ោអបអរយ៉ាងកងរំពងពីក្រុមមនុស្សទាំងអស់នោះ។
ក្រុមអាហ្សង់ទីន បានឈ្នះពានរង្វាន់ World Cup ជាលើកទី៣ របស់ពួកគេ កាលពីថ្ងៃអាទិត្យ ដោយសារពួកគេដណ្ដើមបានជ័យជម្នះ ៤-២ លើក្រុមបារាំង ក្នុងវគ្គផ្ដាច់ព្រ័ត្រ ដោយការស៊ុតបាល់ប៉េណាល់ទីកាត់ក្ដី បន្ទាប់ពីស៊ុបភើស្តារ Lionel Messi ស៊ុតបញ្ចូលទីបាន ២គ្រាប់ ក្នុងលទ្ធផលស្មើ ៣-៣ ហើយកីឡាករ Mbappe សម្រេចបានហ៊ែតទ្រិក (ស៊ុត ៣គ្រាប់) ដែលជាគ្រាប់បាល់ជួយឱ្យក្រុមជើងឯកចាស់ តាមស្មើពីការនាំមុខ ២-០ និង ៣-២៕
