ក្រុមបាល់ទាត់ជម្រើសជាតិអាហ្សង់ទីន នឹងប្រារព្ធពិធីអពអរនៃការឈ្នះពានរង្វាន់ World Cup របស់ពួកគេ នៅថ្ងៃអង្គារនេះ ក្នុងទីក្រុង Buenos Aires នៅឯវិមានអនុស្សាវរីយ៍ Obelisk ដែលជាចំណុចកណ្តាលនៃការប្រារព្ធពិធីកីឡាប្រពៃណី។ នេះបើតាមការឱ្យដឹងពីសហព័ន្ធកីឡាបាល់ទាត់ជាតិ (AFA) កាលពីថ្ងៃចន្ទ។
AFA បានបញ្ជាក់នៅលើគណនី Twitter ផ្លូវការរបស់ខ្លួនថា៖ «ក្រុមជើងឯកពិភពលោក នឹងចាកចេញ នៅថ្ងៃត្រង់ នាថ្ងៃអង្គារនេះ ឆ្ពោះទៅកាន់វិមាន Obelisk ដើម្បីប្រារព្ធពិធីអបអរពានរង្វាន់ពិភពលោកជាមួយអ្នកគាំទ្រ»។
ក្រុមពពកសអាហ្សង់ទីន ដែលដណ្ដើមបានជ័យជម្នះលើក្រុមមាន់គកបារាំង កាលពីថ្ងៃអាទិត្យ នឹងធ្វើដំណើរមកដល់ប្រទេសរបស់ខ្លួន នៅព្រឹកថ្ងៃអង្គារនេះ តាមជើងហោះហើររបស់រដ្ឋ ហើយចំណាយពេលមួយយប់ នៅឯមជ្ឈមណ្ឌលហ្វឹកហ្វឺនរបស់សហព័ន្ធ ដែលមានទីតាំង នៅជិតអាកាសយានដ្ឋាននេះតែម្ដង។ នេះបើយោងតាមបណ្ដាញសារព័ត៌មាន ក្នុងស្រុក។
ក្រុមអាហ្សង់ទីន បានយកឈ្នះក្រុមបារាំង ក្នុងលទ្ធផល ៤-២ ដោយការទាត់បាល់ប៉េណាល់ទីកាត់ក្ដី ក្រោយពីស្មើគ្នា ៣-៣ ក្នុងការប្រកួតដ៏ជក់ចិត្តរយៈពេល ១២០នាទី ដែលភាគច្រើនបានចាត់ទុកថា ជាវគ្គផ្តាច់ព្រ័ត្រល្អបំផុតមួយ ក្នុងប្រវត្តិសាស្ត្ររបស់ World Cup។
ប្រជាជនអាហ្សង់ទីន ដែលបានដើរគ្រប់ច្រកល្ហកនៃផ្លូវទាំងអស់របស់ប្រទេស បន្ទាប់ពីក្រុមឈ្នះពានរង្វាន់ World Cup ជាលើកទី៣ កំពុងរង់ចាំយ៉ាងអន្ទះសានៃការមកដល់របស់ក្រុម ដើម្បីបន្តការប្រារព្ធពិធីនេះ។
ប្រធានក្រុមជម្រើសជាតិ កីឡាករពេញដោយទេពកោសល្យ Lionel Messi បាននិយាយថា៖ «ខ្ញុំចង់នៅអាហ្សង់ទីន ដើម្បីបានឃើញថា តើវានឹងមានភាពរីករាយកម្រិតណាទៅ។ ខ្ញុំចង់ឱ្យពួកគេរង់ចាំខ្ញុំ ខ្ញុំមិនអាចរង់ចាំបានទៀតទេ ក្នុងការទៅទីនោះ ដើម្បីរីករាយជាមួយពួកគេ»៕
