ភ្នំពេញ៖ស្ត្រីម្នាក់អង្គុយលើម៉ូតូត្រូវជនសង្ស័យជិះកង់មកច្រាននាងឱ្យដួល រួចប្លន់យកម៉ូតូព្យាយាម ជិះរត់គេច តែត្រូវម្ចាស់ម៉ូតូស្រែកផ្អើល ពលរដ្ឋជួយដេញចាប់បានយកឱ្យសមត្ថកិច្ច។ ករណីនេះ បានកើតឡើងនៅផ្លូវបេតុងផ្សារដីថ្មី ក្នុងសង្កាត់ស្ទឹងមានជ័យទី៣ ខណ្ឌមានជ័យ កាលពីរំលង អធ្រាត្រឈានចូលថ្ងៃទី២០ ខែធ្នូ។
ស្ត្រីរងគ្រោះបានឱ្យដឹងថា មុនកើតហេតុ នាងកំពុងអង្គុយលើម៉ូតូម៉ាកប៊ីត ផ្លាកលេខភ្នំពេញ1JL-3822 ។ពេលនោះស្រាប់តែជនសង្ស័យជិះកង់មកឈប់ក្បែរ ហើយបានច្រានរូបនាងឱ្យធ្លាក់ពីលើម៉ូតូ រួចជនសង្ស័យឡើងជិះម៉ូតូបើកគេចខ្លួនតាមផ្លូវវ៉េងស្រេង។
ភ្លាមៗនោះនាងក៏បានស្រែកចោរៗ បង្កការភ្ញាក់ផ្អើលដល់ប្រជាពលរដ្ឋជួយដេញចាប់ជនសង្ស័យបានយកប្រគល់ឱ្យសមត្ថកិច្ច។ក្រោយមកកម្លាំងមូលដ្ឋានបាននាំជនសង្ស័យទៅប៉ុស្ដិ៍នគរបាលរដ្ឋបាលស្ទឹងមានជ័យទី៣ ដើម្បីបន្តនីតិវិធី៕ដោយ៖វិចិត្រ
