បើទោះបីជាមានការខកចិត្តយ៉ាងខ្លាំង ដោយការធ្លាក់ចេញពីព្រឹត្តិការណ៍ World Cup 2022 ក្នុងវគ្គ ៨ក្រុមចុងក្រោយក៏ដោយ ក៏សហព័ន្ធកីឡាបាល់ទាត់អង់គ្លេស (FA) បានបញ្ជាក់អះអាង កាលពីថ្ងៃអាទិត្យថា លោក Gareth Southgate នឹងនៅតែជាអ្នកចាត់ការរបស់ក្រុមជម្រើសជាតិអង់គ្លេសដដែល។
គ្រូបង្វឹកវ័យ ៥២ឆ្នាំរូបនេះ បាននិយាយបន្ទាប់ពីការរងបរាជ័យ ដោយសារក្រុមការពារជើងឯកបារាំង ក្នុងលទ្ធផល ២-១ នៅប្រទេសកាតា កាលពីសប្តាហ៍មុនថា គាត់នឹងចំណាយពេល ក្នុងការពិចារណា មុននឹងធ្វើការសម្រេចចិត្តលើអនាគតរបស់ខ្លួន។ ប៉ុន្តែពេលនេះ គាត់នឹងបន្តដឹកនាំក្រុមតោកំណាចរហូតដល់បញ្ចប់ការប្រកួតជើងឯកអឺរ៉ុប ក្នុងឆ្នាំ២០២៤។
នាយកប្រតិបត្តិរបស់ FA លោក Mark Bullingham បានថ្លែងឱ្យដឹងថា៖ «យើងមានក្តីរីករាយ ក្នុងការបញ្ជាក់ប្រាប់ថា លោក Gareth Southgate កំពុងបន្តធ្វើតួនាទីជាអ្នកចាត់ការរបស់ក្រុមជម្រើសជាតិអង់គ្លេស ហើយនឹងដឹកនាំក្រុម ក្នុងយុទ្ធនាការ Euro 2024។ លោក Gareth និងលោក Steve Holland (ជំនួយការគ្រូបង្វឹក) តែងតែទទួលបានការគាំទ្រយ៉ាងពេញទំហឹងពីយើង ហើយផែនការរបស់យើង សម្រាប់ការប្រកួតប្រជែងជើងឯកអឺរ៉ុប ចាប់ផ្តើម នាពេលនេះហើយ»។
ក្រុមអង់គ្លេសមិនបានឈ្នះពានរង្វាន់ធំណាមួយឡើយ ចាប់តាំងពីក្លាយជាជើងឯក នៅ World Cup ក្នុងឆ្នាំ១៩៦៦ ប៉ុន្តែក្រោមការដឹកនាំរបស់លោក Southgate ពួកគេបានធ្វើដំណើរដល់វគ្គពាក់កណ្តាលផ្តាច់ព្រ័ត្រ ក្នុងព្រឹត្តិការណ៍នេះ កាលពី ៤ឆ្នាំ និងវគ្គផ្តាច់ព្រ័ត្រ នៅអឺរ៉ុប នាឆ្នាំមុន។ កិច្ចសន្យាបច្ចុប្បន្នរបស់គាត់ មានសុពលភាពរហូតដល់ខែធ្នូ ឆ្នាំ២០២៤៕
