ខ្សែប្រយុទ្ធដ៏ឆ្នើម Lionel Messi របស់ក្រុមជម្រើសជាតិអាហ្សង់ទីន កាលពីថ្ងៃអាទិត្យ បានប្តេជ្ញាចិត្ត បន្តបំពេញតួនាទី ក្នុងនាមជាកីឡាករនៃប្រទេសរបស់ខ្លួនទៀត បើទោះបីជា នៅទីបំផុតសម្រេចបាននូវ មហិច្ឆតា ក្នុងជីវិត ដោយការឈ្នះពានរង្វាន់ពីព្រឹត្តិការណ៍ World Cup ដូចបំណងហើយក៏ដោយ។
«ខ្ញុំចង់បន្តចែករំលែកបទពិសោធន៍ដល់ការប្រកួត ២-៣លើកទៀត ក្នុងនាមជាជើងឯកពិភពលោក»។ នេះជាសម្ដីរបស់កីឡាករ Messi វ័យ ៣៥ឆ្នាំ ដែលបានប្រាប់ទូរទស្សន៍នៃប្រទេសអាហ្សង់ទីន បន្ទាប់ពីក្រុមពពកសទទួលបានជ័យជម្នះ ដោយការស៊ុតបាល់ប៉េណាល់ទីកាត់ក្ដីលើក្រុមជើងឯកចាស់បារាំង ក្នុងការប្រកួតវគ្គផ្តាច់ព្រ័ត្រ នាទីក្រុងដូហា ប្រទេសកាតា កាលពីម្សិលមិញ។
ប៉ុន្តែយ៉ាងណាក្ដី កីឡាករ Messi បានទទួលស្គាល់ថា ជិតដល់ពេល ដែលត្រូវទាញវាំងននបិទ ដើម្បីបញ្ចប់អាជីពដ៏រុងរឿងរបស់ខ្លួនហើយ បន្ទាប់ពីប្រធានក្រុមអាហ្សង់ទីនរូបនេះ បានសម្រេចគោលបំណង ដោយការយកពានរង្វាន់អន្តរជាតិដ៏សំខាន់មួយ មកបញ្ចូលបង្គ្រប់ក្នុងពានរង្វាន់ធំៗផ្សេងទៀត ដែលរូបគេបានឈ្នះទាំងជាមួយក្រុម និងផ្ទាល់ខ្លួន។
ខ្សែប្រយុទ្ធរបស់ក្លិប Paris Saint-Germain រកបាន ២គ្រាប់ ក្នុងការប្រកួតវគ្គផ្តាច់ព្រ័ត្រដ៏គួរឱ្យភ្ញាក់ផ្អើល និងច្របូកច្របល់ ដែលបានបញ្ចប់ទៅក្នុងលទ្ធផល ៣-៣ ក្រោយរយៈពេល ១២០នាទី មុនពេលក្រុមអាហ្សង់ទីនរបស់កីឡាករជយលាភីពាន Ballon d’Or ៧សម័យកាល បានយកឈ្នះក្នុងវគ្គប៉េណាល់ទី ៤-២។
បន្ទាប់ពីជួបនូវការខកចិត្តម្ដងហើយម្ដងទៀត នៅលើឆាកដ៏ធំបំផុត ក្នុងការប្រកួតបាល់ទាត់ ក្នុងនោះរួមទាំងការចាញ់ ក្នុងប្រកួតវគ្គផ្តាច់ព្រ័ត្រ នៅ World Cup 2014 ក្រោមស្នាដៃរបស់ក្រុមអាល្លឺម៉ង់ នៅប្រទេសប្រេស៊ីល កីឡាករ Messi បាននិយាយថា រូបគេតែងតែមានអារម្មណ៍ថា ពេលវេលារបស់គេនឹងមកដល់ជាមិនខាន។
ដោយងាកមកចាប់អារម្មណ៍លើការប្រកួតវិញ កីឡាករ Messi បានប្រាប់ថា វាគឺពិតជាពិបាកណាស់ ក្នុងការពន្យល់ពីមូលហេតុ ដែលក្រុមអាហ្សង់ទីនបានធ្វើឱ្យការនាំមុខ ២គ្រាប់របស់ខ្លួនបាត់បង់យ៉ាងគួរសោកស្ដាយ ដោយភ្លាត់បណ្ដោយឱ្យក្រុមគូបដិបក្ខតាមស្មើ នៅចុងម៉ោង ដោយរូបភាពនេះ ដូចទៅនឹងហ្គេម ដែលពួកគេដណ្ដើមបានជ័យជម្នះ ក្នុងវគ្គ ១/៤ ផ្តាច់ព្រ័ត្រលើក្រុមហូឡង់ កាលពីជាង ១សប្តាហ៍កន្លងទៅ។
សម្រាប់កីឡាករ Messi រូបគេលេងឱ្យក្រុមអាហ្សង់ទីនបានចំនួន ១៧២លើក ដោយក្នុងនោះស៊ុតបញ្ចូលទីបាន ៩៨គ្រាប់ គិតចាប់តាំងពីបង្ហាញខ្លួនជាលើកដំបូង ក្នុងឆ្នាំ២០០៥។
ជ័យជម្នះរបស់ក្រុមអាហ្សង់ទីននេះ មិនត្រឹមតែនាំឱ្យក្រុមរបស់តំបន់អាមេរិកឡាទីនមួយនេះ ឈ្នះពាន World Cup ជាលើកទី៣ ប៉ុណ្ណោះទេ តែថែមទាំងរារាំងក្រុមបារាំង ក្នុងការបានក្លាយជាក្រុមដំបូងគេ រយៈពេល ៦០ឆ្នាំ ដែលការពារជើងឯកបានសម្រេច៕
