ខ្សែប្រយុទ្ធ Kylian Mbappe របស់ក្រុមជម្រើសជាតិបារាំង បានឈ្នះពានរង្វាន់ស្បែកជើងមាស ក្នុងព្រឹត្តិការណ៍ World Cup ជាមួយនឹងការស៊ុតបញ្ចូលទីបាន ៨គ្រាប់ បន្ទាប់ពីធ្វើបានហ៊ែតទ្រិក (ស៊ុត ៣គ្រាប់) ក្នុងការប្រកួតវគ្គផ្ដាច់ព្រ័ត្រ កាលពីថ្ងៃអាទិត្យ ដែលក្រុមមាន់គកបារាំង បានចាញ់ក្រុមពពកសអាហ្សង់ទីន ក្នុងវគ្គប៉េណាល់ទីកាត់ក្ដី បន្ទាប់ពីស្មើគ្នា ៣-៣ ក្រោយរយៈពេល ១២០នាទី។
កីឡាករ Mbappe បានក្លាយជាអ្នកស៊ុតបញ្ចូលទីទី២ ដែលអាចទម្លុះសំណាញ់ទី ៣ដង ក្នុងវគ្គផ្តាច់ព្រ័ត្រ នៅ World Cup បន្ទាប់ពីលោក Geoff Hurst របស់ក្រុមជម្រើសជាតិអង់គ្លេស ក្នុងឆ្នាំ១៩៦៦ ហើយបានបញ្ចប់យុទ្ធនាការ ដោយលើស ១គ្រាប់លើកីឡាករ Lionel Messi ដែលជាប់ឈ្មោះជាកីឡាករល្អបំផុត ក្នុងហ្គេមផ្ដាច់ព្រ័ត្រ នៅប្រទេសកាតានេះ។
Messi ជាកីឡាករដំបូងគេ ដែលរកគ្រាប់បាល់បានរហូត ទាំងក្នុងវគ្គចែកពូល និងវគ្គចាញ់ធ្លាក់ ទាំង ៤លើក។ តែកីឡាករ Mbappe វ័យ ២៣ឆ្នាំ ស៊ុតបញ្ចូលទីបាន ១២គ្រាប់ ក្នុងការប្រកួតចំនួន ១៤ដង នៅ World Cup ហើយស្ថិតក្នុងកម្រិតស្មើគ្នានឹងវីរបុរសរបស់ក្រុមប្រេស៊ីល លោក Pele ដោយឈរនៅចំណាត់ថ្នាក់លេខ ៦ ក្នុងបញ្ជីកំណត់ត្រា។
Mbappe ទើបតែជាកីឡាករទី ២ ប៉ុណ្ណោះ ដែលដាក់គោលដៅឱ្យបានជោគជ័យ ក្នុងវគ្គផ្តាច់ព្រ័ត្រ នៅ World Cup ជាប់ៗគ្នា បន្ទាប់ពីលោក Vava ដែលស៊ុតបញ្ចូលទីបាន ក្នុងជ័យជម្នះរបស់ក្រុមប្រេស៊ីល ទាំងក្នុងឆ្នាំ១៩៥៨ និងឆ្នាំ១៩៦២។ លើសពីនេះទៀត ៤គ្រាប់របស់ខ្សែប្រយុទ្ធនៃក្លិប Paris Saint-Germain ក្នុងការប្រកួតនៃវគ្គផ្តាច់ព្រ័ត្រ នៅ World Cup នេះ ក៏ជាគ្រាប់បាល់ច្រើនជាងគេបំផុតផងដែរ ក្នុងប្រវត្តិសាស្ត្រ៕
