តៃវ៉ាន់នៅសប្តាហ៍នេះ បានបើកការស៊ើបអង្កេតលើវេទិកាប្រព័ន្ធផ្សព្វផ្សាយចិន TikTok ដោយសង្ស័យថាបានធ្វើប្រតិបត្តិការពាណិជ្ជកម្មខុសច្បាប់នៅលើកោះ។
យោងតាមសេចក្តីថ្លែងការណ៍មួយកាលពីល្ងាចថ្ងៃអាទិត្យម្សិលមិញដោយក្រុមប្រឹក្សាកិច្ចការចិនដីគោករបស់តៃវ៉ាន់ បានឲ្យដឹងថា មន្ទិលសង្ស័យបានកើតដំបូងតាំងពីថ្ងៃទី ៩ ខែធ្នូមកម្ល៉េះ ក្រុមការងារក្រោមគណៈរដ្ឋមន្ត្រីបានរកឃើញថា TikTok ត្រូវបានសង្ស័យថាមាន “ប្រតិបត្តិការពាណិជ្ជកម្មខុសច្បាប់” នៅកោះតៃវ៉ាន់។ កាសែត Liberty Times របស់តៃវ៉ាន់បានរាយការណ៍ថា ByteDance ជាម្ចាស់ TikTok បានបង្កើតក្រុមហ៊ុនបុត្រសម្ព័ន្ធមួយនៅលើកោះនេះ ដើម្បីផ្សព្វផ្សាយពាណិជ្ជកម្មដោយបំពានច្បាប់តៃវ៉ាន់ ដែលវេទិកាប្រព័ន្ធផ្សព្វផ្សាយសង្គមរបស់ចិនមិនត្រូវបានអនុញ្ញាតឱ្យធ្វើពាណិជ្ជកម្មនៅលើកោះនោះទេ។ ក្រុមប្រឹក្សាកិច្ចការដីគោកឆ្លើយតបនឹងរបាយការណ៍នោះថា ក្រុមការងាររបស់គណៈរដ្ឋមន្ត្រីបានរកឃើញថាពិតជាមានការសង្ស័យថាបំពានច្បាប់ ហើយអាជ្ញាធរផ្នែកច្បាប់កំពុងស៊ើបអង្កេត។
អាជ្ញាធរបានកត់សម្គាល់ “ក្នុងរយៈពេលប៉ុន្មានឆ្នាំថ្មីៗនេះ ភាគីចិនដីគោកបានប្រើប្រាស់វេទិកាវីដេអូខ្លីៗដូចជា TikTok ដើម្បីអនុវត្តប្រតិបត្តិការយល់ដឹង និងការជ្រៀតចូលប្រឆាំងនឹងប្រទេសដទៃទៀត ហើយវាមានហានិភ័យខ្ពស់ដែលរដ្ឋាភិបាលចិនកំពុងប្រមូលព័ត៌មានផ្ទាល់ខ្លួនរបស់អ្នកប្រើប្រាស់”។ ជុំវិញការចោទប្រកាន់នេះ TikTok មិនបានឆ្លើយតបភ្លាមៗចំពោះសំណើសុំការអត្ថាធិប្បាយនោះទេ៕
ប្រភព៖ REUTERS
ប្រភពរូប៖REUTERS
ប្រែសម្រួល៖សុខ តុលា