ភ្នំពេញ៖ក្មេងស្ទាវមួយក្រុមមានបក្ខពួកពី៦-៧នាក់ និងម្ខាងទៀតមានគ្នា៣នាក់ គ្រាន់តែមើលមុខគ្នា ស្រាប់តែខាងគ្នាច្រើនប្រើកាំបិតប៉័ងតោនិងដាវដេញកាប់ខាង៣នាក់ឱ្យរបួសធ្ងន់ម្នាក់។ហេតុការណ៍ដ៏សាហាវយង់ឃ្នងនេះបានកើតឡើងនៅលើផ្លូវជាតិលេខ៣ មុខបុរីលនស៊ីធី ភូមិព្រៃព្រីងត្បូងទី១ សង្កាត់ចោមចៅទី២ ខណ្ខពោធិ៍សែនជ័យ កាលពីយប់ថ្ងៃទី១៨ ខែធ្នូ។
![](https://cambodiaflashnews.com/wp-content/uploads/2021/06/top-banner.gif)
មន្ត្រីមូលដ្ឋានបានឱ្យដឹងថា ជនរងគ្រោះឈ្មោះ ឈាន ថៃ អាយុ១៨ឆ្នាំ ជាកម្មករសំណង់ ស្នាក់នៅភូមិ-សង្កាត់ខាងលើ រងរបួសផ្នែកកនិងឆ្អឹងខ្នង។មុនកើតហេតុ ជនរងគ្រោះមានគ្នា៣នាក់ ជិះម៉ូតូមួយគ្រឿងម៉ាកហុងដាឌ្រីមផ្លាកលេខភ្នំពេញ1JS-4108 ចេញពីកន្លែងផឹកស៊ីរួចទៅការដ្ឋានសំណង់វិញ។ពួកគេជិះម៉ូតូតាមផ្លូវជាតិលេខ៣ពីត្បូងទៅជើង ដល់មុខវត្តព្រៃស្ពឺមានក្រុមក្មេងទំនើងជិះម៉ូតូ៣គ្រឿងមានគ្នា៦-៧នាក់បានក្រឡេកមើលមុខខាង៣នាក់ រួចជិះម៉ូតូវ៉ាទៅមុខ។
បន្ទាប់មកក្រុមទំនើងទាំងនោះប្រដាប់ដោយកាំបិតប៉័ងតោនិងដាវ បានដេញកាប់ខាង៣នាក់ដោយចោទថាក្រុមជនរងគ្រោះមើលមុខឌឺពួកគេ ហើយនាំគ្នាកាប់បណ្តាលឱ្យខាង៣នាក់រងរបួសធ្ងន់ម្នាក់ ចំណែក២នាក់ទៀតរត់គេចរួចខ្លួនទាន់។ក្រោយកើតហេតុ ក្រុមទំនើងទាំងនោះបានរត់គេចខ្លួនបាត់អស់។ចំណែកជនរងគ្រោះត្រូវបានរថយន្តកងពលតូចលេខ៧០ ដឹកយកទៅសង្គ្រោះភ្លាមៗ៕ដោយ៖វិចិត្រ